Read Ang Biblia, 2001 Isaias 34 Bible Online

Isaias 34 - Ang Biblia, 2001 bible

Isaias 34

¹Kayo'y magsilapit, kayong mga bansa, upang makinig; at pakinggan ninyo, O mga bayan! Dinggin ng lupa at ng lahat ng narito; ng sanlibutan, at ng lahat na bagay na mula rito.

²Sapagkat ang PANGINOON ay galit laban sa lahat ng bansa, at napopoot laban sa lahat nilang hukbo, kanyang inilaan na sila, kanyang ibinigay sila upang patayin.

³Ang kanilang patay ay itatapon, at ang baho ng kanilang mga bangkay ay aalingasaw; at ang mga bundok ay tutunawin ng kanilang dugo.

⁴Ang lahat ng mga bagay sa langit ay mabubulok, at ang langit ay malululon na parang balumbon. Lahat ng bagay ay babagsak, na parang dahong nalalagas sa puno ng ubas, at gaya ng dahong nalalanta sa puno ng igos.

⁵Sapagkat ang aking tabak ay nalasing sa langit; narito, ito'y bumababa sa Edom, sa bayan na aking itinalaga para hatulan.

⁶Ang PANGINOON ay may tabak na punô ng dugo, ito ay ginawang mataba ng katabaan, sa dugo ng mga kordero at ng mga kambing, sa taba ng mga bato ng mga lalaking tupa. Sapagkat may handog ang PANGINOON sa Bosra, isang malaking patayan sa lupain ng Edom.

⁷Ang maiilap na baka ay mabubuwal na kasama nila, at ang mga batang baka na kasama ng malalakas na toro. Ang kanilang lupain ay basang-basa sa dugo, at ang kanilang alabok ay sasagana sa katabaan.

⁸Sapagkat ang araw ng paghihiganti ay sa PANGINOON, ang taon ng pagganti para sa kapakanan ng Zion.

⁹At ang kanyang mga batis ay magiging alkitran, at ang alabok niya ay magiging asupre, at ang lupain niya ay magiging nagniningas na alkitran.

¹⁰Hindi ito mapapatay sa gabi o sa araw man; ang usok niyon ay paiilanglang magpakailanman. Mula sa isang lahi hanggang sa susunod na lahi ito ay tiwangwang, walang daraan doon magpakailan kailanman.

¹¹Ngunit ito ay aangkinin ng lawin at ng porkupino; at ang kuwago at ang uwak ay maninirahan doon. Kanyang iuunat doon ang pisi ng pagkalito, at ang pabigat ng kawalan sa mga mararangal nito.

¹²Kanilang tatawagin iyon na Walang Kaharian Doon, at lahat niyang mga pinuno ay mawawalang kabuluhan.

¹³At mga tinik ay tutubo sa kanyang mga palasyo, mga dawag at damo sa mga muog niyon. Iyon ay magiging tahanan ng mga asong-gubat, tirahan ng mga avestruz.

¹⁴At ang maiilap na hayop ay makikipagsalubong sa mga asong-gubat, at ang lalaking kambing ay sisigaw sa kanyang kasama; ang malaking kuwago ay maninirahan din doon, at makakatagpo siya ng dakong pahingahan.

¹⁵Doo'y magpupugad at mangingitlog ang ahas, at magpipisa ng itlog at titipunin sa kanyang lilim; doon matitipon ang mga lawin, bawat isa'y kasama ng kanyang kauri.

¹⁶Inyong saliksikin at basahin ang aklat ng PANGINOON: Kahit isa sa mga ito ay hindi magkukulang; walang mangangailangan ng kanyang kasama. Sapagkat iniutos ng bibig ng PANGINOON, at tinipon sila ng kanyang Espiritu.

¹⁷At siya'y nagpalabunutan para sa kanila, at ito'y binahagi ng kanyang kamay sa kanila sa pamamagitan ng pising panukat; ito'y kanilang aariin magpakailanman, mula sa mga sali't salinlahi ay maninirahan sila roon.