Read Ang Biblia, 2001 Isaias 41 Bible Online

Isaias 41 - Ang Biblia, 2001 bible

Isaias 41

¹Tahimik kayong makinig sa akin, O mga lupain sa baybayin; hayaang magpanibagong lakas ang mga bayan; hayaang lumapit sila, at hayaang magsalita sila; tayo'y sama-samang lumapit para sa kahatulan.

²Sinong nagbangon ng matuwid sa silangan, na kaniyang tinawag sa kanyang paanan? Siya'y nagbibigay ng mga bansa sa harap niya, pinasusuko niya ang mga hari; kanyang ginagawa silang parang alabok sa kanyang tabak, na parang pinaspas na dayami ng kanyang busog.

³Kanyang hinahabol sila at lumalampas na payapa sa mga daang hindi dinaanan ng kanyang mga paa.

⁴Sinong nagbalak at nagsagawa nito, na tumawag ng mga salinlahi mula nang pasimula? Akong PANGINOON, ang una, at kasama ng huli, Ako nga.

⁵Nakita ng mga pulo, at natakot, ang mga dulo ng lupa ay nanginig; sila'y lumapit, at pumarito.

⁶Bawat tao'y tumutulong sa kanyang kapwa, at sinasabi sa kanyang kapatid, “Ikaw ay magpakatapang!”

⁷Pinasisigla ng karpintero ang platero, at pinasisigla ng gumagamit ng pamukpok ang pumupukpok ng palihan, na sinasabi tungkol sa paghinang, “Mabuti”; at kanyang inilalapat ng mga pako, upang huwag makilos.

⁸Ngunit ikaw, Israel, lingkod ko, Jacob, na siyang aking pinili, na binhi ni Abraham na aking kaibigan;

⁹ikaw na aking kinuha mula sa mga dulo ng lupa, at tinawag kita mula sa mga pinakamalayong sulok niyon, na sinasabi sa iyo, “Ikaw ay aking lingkod, aking pinili ka at hindi kita itinakuwil”;

¹⁰huwag kang matakot, sapagkat ako'y kasama mo, huwag kang mabalisa, sapagkat ako'y Diyos mo; aking palalakasin ka, oo, ikaw ay aking tutulungan; oo, ikaw ay aking aalalayan ng kanang kamay ng aking katuwiran.

¹¹Narito, silang lahat na nagagalit sa iyo ay mapapahiya at malilito: silang nakikipaglaban sa iyo ay mawawalan ng kabuluhan at mapapahamak.

¹²Iyong hahanapin sila na nakikipaglaban sa iyo, ngunit hindi mo sila matatagpuan; silang nakikipagdigma laban sa iyo ay matutulad sa wala.

¹³Sapagkat ako, ang PANGINOON mong Diyos, ang humahawak ng iyong kanang kamay; ako na nagsasabi sa iyo, “Huwag kang matakot, ikaw ay aking tutulungan.”

¹⁴Huwag kang matakot, ikaw na uod na Jacob, at kayong mga lalaki ng Israel! aking tutulungan ka, sabi ng PANGINOON, ang iyong Manunubos ay ang Banal ng Israel.

¹⁵Narito, ginawa kitang bagong matalas na kasangkapang panggiik, na may mga ngipin; iyong gigiikin ang mga bundok, at dudurugin ang mga iyon, at iyong gagawing parang ipa ang mga burol.

¹⁶Iyong tatahipan sila, at tatangayin ng hangin, at pangangalatin ng ipu-ipo. At ikaw ay magagalak sa PANGINOON, at iyong luluwalhatiin ang Banal ng Israel.

¹⁷Kapag ang dukha at nangangailangan ay humahanap ng tubig, at wala, at ang kanilang dila ay natutuyo dahil sa uhaw, akong PANGINOON ay sasagot sa kanila, akong Diyos ng Israel ay hindi magpapabaya sa kanila.

¹⁸Ako'y magbubukas ng mga ilog sa mga lantad na kaitaasan, at ng mga bukal sa gitna ng mga libis; aking gagawin ang ilang na lawa ng tubig, at ang tuyong lupain ay mga bukal ng tubig.

¹⁹Aking itatanim sa ilang ang sedro, ang puno ng akasya, at ang arayan, at ang olibo; aking ilalagay na magkakasama sa ilang ang sipres na puno, ang alerses at pino;

²⁰upang makita at malaman ng mga tao, isaalang-alang at sama-samang unawain, na ginawa ito ng kamay ng PANGINOON, at nilikha ito ng Banal ng Israel.

²¹Iharap ninyo ang inyong usapin, sabi ng PANGINOON; dalhin ninyo ang inyong mga matibay na dahilan, sabi ng Hari ni Jacob.

²²Hayaang dalhin nila, at ipahayag sa amin kung anong mangyayari. Sabihin sa amin ang mga dating bagay, kung ano ang mga iyon, upang aming malaman ang kalalabasan nila; o ipahayag ninyo sa amin ang mga bagay na darating.

²³Inyong ipahayag ang mga bagay na darating pagkatapos, upang aming malaman na kayo'y mga diyos; oo, kayo'y gumawa ng mabuti, o gumawa ng kasamaan, upang kami ay mawalan ng loob at mamasdan naming sama-sama.

²⁴Narito, kayo'y bale-wala, at walang kabuluhan ang inyong gawa; kasuklamsuklam siya na pumipili sa inyo.

²⁵May ibinangon ako mula sa hilaga, at siya'y dumating; mula sa sikatan ng araw ay tatawag siya sa aking pangalan; siya'y paroroon sa mga pinuno na parang pambayo, gaya ng magpapalayok na tumatapak sa luwad.

²⁶Sinong nagpahayag noon mula nang pasimula upang aming malaman? At nang una, upang aming masabi, “Siya'y matuwid”? Oo, walang nagpahayag, oo, walang nagsalita, oo, walang nakinig ng inyong mga salita.

²⁷Ako'y unang magsasabi sa Zion, narito, narito sila; at ako'y magbibigay sa Jerusalem ng isa na nagdadala ng mga mabuting balita.

²⁸Ngunit nang ako'y tumingin ay walang tao, sa gitna nila ay walang tagapayo na makapagbibigay ng sagot, kapag nagtatanong ako.

²⁹Narito, silang lahat ay masama; ang kanilang mga gawa ay walang kabuluhan, ang kanilang mga larawang inanyuan ay hangin at walang laman.