Read Ang Biblia, 2001 Isaias 43 Bible Online

Isaias 43 - Ang Biblia, 2001 bible

Isaias 43

¹Ngunit ngayo'y ganito ang sabi ng PANGINOON, siya na lumalang sa iyo, O Jacob, siya na nag-anyo sa iyo, O Israel: “Huwag kang matakot, sapagkat ikaw ay tinubos ko; tinawag kita sa pangalan mo, ikaw ay akin.

²Kapag ikaw ay dumaraan sa tubig, ako'y makakasama mo; at sa pagtawid sa mga ilog ay hindi ka nila aapawan, kapag ikaw ay lumalakad sa apoy, hindi ka masusunog; at hindi ka tutupukin ng apoy.

³Sapagkat ako ang PANGINOON mong Diyos, ang Banal ng Israel, ang iyong Tagapagligtas. Aking ibinigay ang Ehipto bilang pantubos sa iyo, ang Etiopia at ang Seba bilang kapalit mo.

⁴Sapagkat ikaw ay mahalaga sa aking paningin, at kagalang-galang, at minamahal kita, nagbibigay ako ng mga tao na pamalit sa iyo, at mga bayan na kapalit ng buhay mo.

⁵Huwag kang matakot, sapagkat ako'y kasama mo; aking dadalhin ang iyong lahi mula sa silangan, at titipunin kita mula sa kanluran.

⁶Aking sasabihin sa hilaga, Hayaan mo, at sa timog, Huwag mong pigilin; dalhin mo rito ang aking mga anak na lalaki na sa malayo nagmula, at ang aking mga anak na babae na mula sa mga dulo ng lupa,

⁷bawat tinatawag sa aking pangalan, sila na aking nilikha ay para sa aking kaluwalhatian, oo, yaong aking inanyuan, oo, yaong aking ginawa.”

⁸Iyong ilabas ang mga taong bulag, gayunma'y may mga mata, na mga bingi, gayunma'y may mga tainga!

⁹Hayaang sama-samang magtipon ang lahat na bansa, at magpulong ang mga bayan. Sino sa kanila ang makapagpapahayag nito, at makapagsasabi sa amin ng mga dating bagay? Dalhin nila ang kanilang mga saksi, upang sila'y mapawalang-sala, at dinggin nila, at sabihin, Katotohanan nga.

¹⁰“Kayo'y aking mga saksi,” sabi ng PANGINOON, “at aking lingkod na aking pinili, upang inyong malaman at manampalataya kayo sa akin, at inyong maunawaan na Ako nga. Walang diyos na inanyuan na una sa akin, o magkakaroon man pagkatapos ko.

¹¹Ako, ako ang PANGINOON, at liban sa akin ay walang tagapagligtas.

¹²Ako'y nagpahayag, ako'y nagligtas, at ako'y nagpakilala, nang walang ibang diyos sa gitna ninyo; at kayo ang aking mga saksi,” sabi ng PANGINOON.

¹³“Ako ang Diyos, at mula sa walang hanggan ay ako nga; walang sinumang makapagliligtas mula sa aking kamay; ako'y gumagawa at sinong pipigil?”

¹⁴Ganito ang sabi ng PANGINOON, na inyong Manunubos, ang Banal ng Israel: “Dahil sa inyo ay magsusugo ako sa Babilonia, at aking ibinaba silang lahat na parang mga palaboy, at ang sigawan ng mga Caldeo ay magiging panaghoy.

¹⁵Ako ang PANGINOON, ang inyong Banal, ang Maylalang ng Israel, ang inyong Hari.”

¹⁶Ganito ang sabi ng PANGINOON, na gumagawa ng daan sa dagat, at sa malalawak na tubig ay mga landas,

¹⁷na nagpalabas ng karwahe at kabayo, ng hukbo at ng mandirigma; sila'y magkasamang humihiga, hindi sila makabangon, sila'y namamatay, nauupos na parang mitsa.

¹⁸“Huwag ninyong alalahanin ang mga dating bagay, o isaalang-alang man ang mga bagay nang una.

¹⁹Narito, ako'y gagawa ng isang bagong bagay; ngayon iyon ay lalabas; hindi ba ninyo malalaman iyon? Gagawa ako ng daan sa ilang, at ng mga ilog sa disyerto.

²⁰Pararangalan ako ng mababangis na hayop ng mga asong-gubat at ng mga avestruz; sapagkat ako'y nagbibigay ng tubig sa ilang, at ng mga ilog sa disyerto, upang bigyan ng inumin ang pinili kong bayan,

²¹ang bayan na aking inanyuan para sa aking sarili, upang kanilang ipahayag ang aking kapurihan.

²²“Gayunma'y hindi ka tumawag sa akin, O Jacob; kundi ikaw ay nayamot sa akin, O Israel!

²³Hindi mo dinala sa akin ang iyong tupa para sa handog na sinusunog, o pinarangalan mo man ako ng iyong mga handog. Hindi ko ipinapasan sa iyo ang mga handog, o pinahirapan ka man sa pamamagitan ng kamanyang.

²⁴Hindi mo ako ibinili ng mabangong kalamo sa halaga ng salapi, o binusog mo man ako ng taba ng iyong mga handog. Kundi pinagpasan mo ako ng iyong mga kasalanan, iyong pinahirapan ako ng iyong mga kasamaan.

²⁵Ako, ako nga ang siyang pumapawi ng iyong mga pagsuway alang-alang sa akin, at hindi ko aalalahanin ang iyong mga kasalanan.

²⁶Ilagay mo ako sa alaala, tayo'y kapwa mangatuwiran; sabihin mo upang ikaw ay mapatunayang matuwid.

²⁷Ang iyong unang ama ay nagkasala, at ang iyong mga tagapagsalita ay nagsisalangsang laban sa akin.

²⁸Kaya't aking durungisan ang mga pinuno ng santuwaryo, at dadalhin ko ang Jacob sa pagkawasak at ang Israel sa pagkakutya.