Read Ang Biblia, 2001 Isaias 46 Bible Online

Isaias 46 - Ang Biblia, 2001 bible

Isaias 46

¹Si Bel ay nagpapatirapa, si Nebo ay yumuyukod; ang kanilang mga diyus-diyosan ay pasan ng mga baka at mga hayop; ang mga bagay na ito na inyong dala-dala ay mabigat na pasan sa pagod.

²Sila'y yumuyukod, sila'y nagpapatirapang magkakasama; hindi nila mailigtas ang pasan, kundi sila ma'y tutungo sa pagkabihag.

³“Inyong dinggin ako, O sambahayan ni Jacob, at lahat na nalabi sa sambahayan ni Israel, na kinalong ko mula sa iyong pagsilang, na dinala mula sa sinapupunan;

⁴at hanggang sa katandaan mo ay ako siya, at hanggang sa magkauban ay dadalhin kita. Ginawa kita at aking dadalhin ka. Aking dadalhin at ililigtas ka.

⁵“Kanino ninyo ako itutulad, at ihahambing ako upang kami ay maging magkatulad?

⁶Sila'y dumudukot ng maraming ginto sa supot, at nagtitimbang ng pilak sa timbangan, na nagsisiupa ng panday-ginto, at kanyang ginagawang diyos; oo, sila'y nagpapatirapa, at nagsisisamba!

⁷Ipinapasan nila iyon sa balikat, dinadala nila iyon, inilalagay nila iyon sa kanyang lugar, at iyon ay nakatayo roon; mula sa kanyang dako ay hindi siya makakilos. Oo, may dadaing sa kanya, gayon ma'y hindi siya makasasagot, o makapagliligtas man sa kanya sa kanyang kabagabagan.

⁸“Inyong alalahanin ito, at maging tiyak, isaisip ninyo uli, kayong mga masuwayin,

⁹inyong alalahanin ang mga dating bagay nang una, sapagkat ako'y Diyos, at walang iba; ako'y Diyos, at walang gaya ko,

¹⁰na nagpapahayag ng wakas mula sa pasimula, at mula nang mga unang panahon, ng mga bagay na hindi pa nangyayari; na nagsasabi, ‘Ang layunin ko ay maitatatag, at gagawin ko ang lahat ng aking kaligayahan,’

¹¹na tumatawag ng ibong mandaragit mula sa silangan, ng taong gumagawa ng aking layunin mula sa malayong lupain; oo, aking sinabi, oo, aking papangyayarihin, aking pinanukala, at akin itong gagawin.

¹²“Makinig kayo sa akin, kayong matitigas ang puso, kayo na malayo sa katuwiran:

¹³Aking inilalapit ang aking katuwiran, hindi ito malayo, at ang aking pagliligtas ay hindi magtatagal; at aking ilalagay ang kaligtasan sa Zion, para sa Israel na aking kaluwalhatian.”