Read Ang Biblia, 2001 Isaias 8 Bible Online

Isaias 8 - Ang Biblia, 2001 bible

Isaias 8

¹Sinabi ng PANGINOON sa akin, “Kumuha ka ng malapad na tabla, at sulatan mo ng pangkaraniwang titik, ‘Kay Maher-shalalhash-baz.’”

²Mayroon akong mga tapat na saksi upang sumaksi sa akin, si Urias na pari at si Zacarias na anak ni Jeberekias.

³At ako'y naparoon sa propetisa; at siya'y naglihi, at nanganak ng isang lalaki. At sinabi ng PANGINOON sa akin, “Tawagin mo ang kanyang pangalan na Maher-shalalhash-baz.

⁴Sapagkat bago ang bata ay matutong magsalita ng, ‘Ama ko,’ o ‘Ina ko,’ ang kayamanan ng Damasco at ang samsam sa Samaria ay kukunin sa harapan ng hari ng Asiria.”

⁵At nagsalitang muli ang PANGINOON sa akin:

⁶“Yamang tinanggihan ng bayang ito ang tubig ng Siloa na umaagos na marahan, at magalak sa harapan ni Rezin at sa anak ni Remalias;

⁷kaya't narito, iniaahon ng PANGINOON sa kanila ang tubig ng Ilog, malakas at marami, ang hari ng Asiria at ang lahat niyang kaluwalhatian. Siya'y aahon sa lahat niyang daluyan, at aapaw sa lahat niyang baybayin.

⁸Ito'y aagos hanggang sa Juda, aapaw at aabot hanggang sa leeg; at ang nakabuka niyang mga pakpak ang siyang magpupuno ng lawak ng iyong lupain, O Emmanuel.”

⁹Kayo'y magsama-sama, mga bayan, at mabalisa, kayo'y makinig, kayong lahat na malayong lupain; magbigkis kayo, at kayo'y mabagabag, kayo'y magbigkis, at kayo'y mabagabag.

¹⁰Magsanggunian kayo, ngunit iyon ay mauuwi sa wala; magsalita kayo ng salita ngunit iyon ay hindi mananatili, sapagkat ang Diyos ay kasama namin.

¹¹Sapagkat ang PANGINOON ay nagsalitang ganito sa akin na may malakas na kamay, at binalaan ako na huwag lumakad sa lakad ng bayang ito, na sinasabi,

¹²“Huwag ninyong tawaging pagsasabwatan ang lahat na tinatawag na pagsasabwatan ng bayang ito, at huwag ninyong katakutan ang kanilang kinatatakutan, o mangilabot man.

¹³Ngunit ang PANGINOON ng mga hukbo, siya ang inyong ituturing na banal; siya ang inyong katakutan, at sa kanya kayo mangilabot.

¹⁴At siya'y magiging santuwaryo ninyo, isang batong katitisuran at malaking batong kabubuwalan ng dalawang sambahayan ng Israel, isang bitag at silo sa mga mamamayan ng Jerusalem.

¹⁵At marami ang matitisod doon; sila'y mabubuwal at mababalian. Sila'y masisilo at mahuhuli.”

¹⁶Talian mo ang patotoo, tatakan mo ang turo sa gitna ng aking mga alagad.

¹⁷Aking hihintayin ang PANGINOON na nagkukubli ng kanyang mukha sa sambahayan ni Jacob, at ako'y aasa sa kanya.

¹⁸Ako at ang mga anak na ibinigay sa akin ng PANGINOON ay mga tanda at kababalaghan sa Israel mula sa PANGINOON ng mga hukbo, na naninirahan sa Bundok ng Zion.

¹⁹At kapag kanilang sinabi sa inyo, “Sumangguni kayo sa mga multo at masasamang espiritu na humuhuni at bumubulong.” Hindi ba dapat sumangguni ang bayan sa kanilang Diyos, ang mga patay para sa mga buháy?

²⁰Sa kautusan at sa patotoo! Kung hindi sila nagsasalita nang ayon sa salitang ito ay sa dahilang wala silang umaga.

²¹At sila'y daraan sa lupain na nahihirapang lubha at gutom, at kapag sila'y nagugutom, sila'y magagalit, at susumpain ang kanilang hari at ang kanilang Diyos, at ititingala ang kanilang mga mukha.

²²Sila'y titingin sa lupa ngunit ang makikita lamang ay kahirapan at kadiliman, ulap ng hapis, at itataboy sila sa makapal na kadiliman.