Read Ang Biblia, 2001 Jeremias 16 Bible Online

Jeremias 16 - Ang Biblia, 2001 bible

Jeremias 16

¹Ang salita ng PANGINOON ay dumating sa akin, na sinasabi,

²“Huwag kang mag-aasawa, o magkakaroon man ng mga anak na lalaki o babae sa lugar na ito:

³Sapagkat ganito ang sabi ng PANGINOON tungkol sa mga anak na lalaki at babae na ipinanganak sa lugar na ito, at tungkol sa mga ina at ama na nagsilang sa kanila sa lupaing ito:

⁴Sila'y mamamatay sa mga masaklap na pagkamatay. Hindi sila tatangisan, ni ililibing man sila. Sila'y magiging gaya ng dumi sa ibabaw ng lupa. Sila'y mamamatay sa tabak at pagkagutom, at ang kanilang mga bangkay ay magiging pagkain ng mga ibon sa himpapawid, at ng mga hayop sa lupa.

⁵“Sapagkat ganito ang sabi ng PANGINOON: Huwag kang pumasok sa bahay ng pagluluksa, o pumaroon upang tumaghoy, o umiyak man sa mga iyon; sapagkat aking inalis ang kapayapaan ko sa bayang ito at ang aking tapat na pag-ibig at habag, sabi ng PANGINOON.

⁶Ang dakila at hamak ay kapwa mamamatay sa lupaing ito; sila'y hindi malilibing, at walang tataghoy para sa kanila o maghihiwa ng sarili o magpapakalbo man para sa kanila.

⁷Walang magpuputol ng tinapay para sa nagluluksa, upang aliwin sila dahil sa namatay; ni ang sinuman ay magbibigay sa kanya ng saro ng kaaliwan upang inumin para sa kanyang ama o ina.

⁸Huwag kang papasok sa bahay na may handaan upang makasalo nila sa pagkain at pag-inom.

⁹Sapagkat ganito ang sabi ng PANGINOON ng mga hukbo, ng Diyos ng Israel: Aking patitigilin sa lugar na ito, sa harapan ng inyong mga mata at sa inyong mga araw, ang tinig ng katuwaan at kasayahan, ang mga tinig ng lalaking ikakasal at ng babaing ikakasal.

¹⁰“At kapag sinabi mo sa mga taong ito ang lahat ng mga salitang ito, at kanilang sasabihin sa iyo, ‘Bakit binigkas ng PANGINOON ang lahat ng malaking kasamaang ito laban sa amin? Ano ang aming kasamaan? Ano ang kasalanang nagawa namin laban sa PANGINOON naming Diyos?’

¹¹Kung magkagayo'y sasabihin mo sa kanila, ‘Sapagkat tinalikuran ako ng inyong mga ninuno, at nagsisunod sa ibang mga diyos, naglingkod sa kanila, nagsisamba sa kanila, tinalikuran ako, at hindi iningatan ang aking kautusan, sabi ng PANGINOON.

¹²At yamang kayo'y nagsigawa ng kasamaan na higit kaysa inyong mga ninuno, sapagkat, masdan ninyo, lumalakad ang bawat isa sa inyo ayon sa katigasan ng kanya-kanyang masamang kalooban, at ayaw makinig sa akin.

¹³Kaya't itataboy ko kayo mula sa lupaing ito tungo sa lupaing hindi ninyo kilala, ni ng inyong mga ninuno. Doo'y maglilingkod kayo sa ibang mga diyos araw at gabi, sapagkat hindi ako magpapakita sa inyo ng anumang paglingap.’

¹⁴“Kaya't ang mga araw ay dumarating, sabi ng PANGINOON, na hindi na sasabihin pa, ‘Habang buháy ang PANGINOON, na nag-ahon sa sambahayan ng Israel mula sa lupain ng Ehipto;’

¹⁵kundi, ‘Habang buháy ang PANGINOON, na nag-ahon sa sambayanan ng Israel mula sa hilagang lupain at mula sa lahat ng lupain na pinagtabuyan niya sa kanila!’ Sapagkat ibabalik ko sila sa kanilang sariling lupain na ibinigay ko sa kanilang mga ninuno.

¹⁶“Narito, ipasusundo ko ang maraming mangingisda, at kanilang huhulihin sila, sabi ng PANGINOON. At pagkatapos ay ipasusundo ko ang maraming mangangaso, at kanilang huhulihin sila sa bawat bundok at burol, at sa mga bitak ng malalaking bato.

¹⁷Sapagkat ang aking mga mata ay nasa lahat ng kanilang lakad, sila'y hindi nakukubli sa akin o nalilingid man ang kanilang kasamaan sa harap ng aking mga mata.

¹⁸At akin munang dalawang ulit na gagantihan ang kanilang kasamaan at ang kanilang kasalanan, sapagkat kanilang dinumihan ang aking lupain ng mga bangkay ng kanilang karumaldumal na mga diyus-diyosan, at kanilang pinuno ang aking mana ng kanilang mga kasuklamsuklam.”

¹⁹O PANGINOON, aking kalakasan at aking tanggulan, at aking kanlungan sa araw ng kaguluhan, sa iyo pupunta ang mga bansa mula sa mga hangganan ng daigdig, at magsasabi, “Ang aming mga ninuno ay walang minana kundi mga kasinungalingan, mga walang kabuluhang bagay na hindi mapapakinabangan.

²⁰Makakagawa ba ang tao para sa kanyang sarili ng mga diyos? Ang mga iyon ay hindi mga diyos!”

²¹“Kaya't ipapaalam ko sa kanila, minsan pa ay ipapaalam ko sa kanila ang aking lakas at ang aking kapangyarihan; at malalaman nila na ang aking pangalan ay PANGINOON.”