Read Ang Biblia, 2001 Jeremias 26 Bible Online

Jeremias 26 - Ang Biblia, 2001 bible

Jeremias 26

¹Nang pasimula ng paghahari ni Jehoiakim na anak ni Josias, hari ng Juda, dumating ang salitang ito mula sa PANGINOON, na sinasabi:

²“Ganito ang sabi ng PANGINOON: Tumayo ka sa bulwagan ng bahay ng PANGINOON at sabihin mo sa lahat ng mga lunsod ng Juda na dumarating upang sumamba sa bahay ng PANGINOON ang lahat ng salita na iniutos ko sa iyo na sabihin sa kanila. Huwag kang magbawas ng kahit isang salita.

³Marahil ay makikinig sila, at bawat tao ay tatalikod sa kanyang masamang lakad; upang baguhin ko ang aking isip tungkol sa kasamaan na aking pinanukalang gawin dahil sa kanilang masasamang gawa.

⁴Sasabihin mo sa kanila, ‘Ganito ang sabi ng PANGINOON: Kung hindi kayo makikinig sa akin, upang lumakad sa aking kautusan na aking inilagay sa harapan ninyo,

⁵at pakinggan ang mga salita ng aking mga lingkod na propeta, na kaagad kong sinugo, bagama't hindi ninyo pinakinggan,

⁶ay akin ngang gagawing gaya ng Shilo ang bahay na ito, at gagawin kong sumpa ang lunsod na ito para sa lahat ng mga bansa sa lupa.’”

⁷At narinig ng mga pari, ng mga propeta, at ng buong bayan si Jeremias na nagsasalita ng mga salitang ito sa bahay ng PANGINOON.

⁸Nang matapos si Jeremias sa pagsasalita ng lahat ng iniutos ng PANGINOON sa kanya na sabihin sa buong bayan, dinakip siya ng mga pari, ng mga propeta, at ng buong bayan, na sinasabi, “Ikaw ay tiyak na mamamatay!

⁹Bakit ka nagsalita ng propesiya sa pangalan ng PANGINOON, na iyong sinasabi, ‘Ang bahay na ito ay magiging gaya ng Shilo, at ang lunsod na ito ay mawawasak, na walang maninirahan?’” At ang lahat ng taong-bayan ay pumalibot kay Jeremias sa bahay ng PANGINOON.

¹⁰Nang mabalitaan ng mga pinuno ng Juda ang mga bagay na ito, sila'y umakyat sa bahay ng PANGINOON mula sa bahay ng hari at sila'y umupo sa pasukan ng Bagong Pintuan ng bahay ng PANGINOON.

¹¹Nang magkagayo'y nagsalita ang mga pari at ang mga propeta sa mga pinuno at sa buong bayan, na sinasabi, “Ang taong ito ay nararapat sa hatol na kamatayan, sapagkat siya'y nagsalita ng propesiya laban sa lunsod na ito, gaya nang narinig ng inyong mga pandinig.”

¹²Pagkatapos ay nagsalita si Jeremias sa lahat ng pinuno at sa buong bayan, na sinasabi, “Sinugo ako ng PANGINOON upang magsalita ng propesiya laban sa bahay na ito at laban sa lunsod na ito ng lahat ng mga salita na inyong narinig.

¹³Kaya't ngayo'y baguhin ninyo ang inyong mga lakad at mga gawa, at sundin ninyo ang tinig ng PANGINOON ninyong Diyos; at babaguhin ng PANGINOON ang kanyang isip tungkol sa kasamaan na kanyang ipinahayag laban sa inyo.

¹⁴Ngunit tungkol sa akin, narito, ako'y nasa inyong kamay. Gawin ninyo sa akin ang inaakala ninyong mabuti at matuwid sa inyo.

¹⁵Tandaan lamang ninyo na kapag ako'y inyong pinatay, kayo'y magdadala ng walang salang dugo sa inyong sarili at sa lunsod na ito at sa mga mamamayan nito, sapagkat totoong sinugo ako ng PANGINOON sa inyo upang sabihin ang lahat ng mga salitang ito sa inyong mga pandinig.”

¹⁶At sinabi ng mga pinuno at ng buong bayan sa mga pari at sa mga propeta, “Ang taong ito ay hindi nararapat sa hatol na kamatayan, sapagkat siya'y nagsalita sa atin sa pangalan ng PANGINOON nating Diyos.”

¹⁷Ang ilan sa matatanda ng lupain ay tumindig at nagsalita sa buong kapulungan ng bayan, na nagsasabi,

¹⁸“Si Micaias na Morastita ay nagsalita ng propesiya sa mga araw ni Hezekias na hari ng Juda, at sinabi sa buong bayan ng Juda: ‘Ganito ang sabi ng PANGINOON ng mga hukbo, Ang Zion ay aararuhing parang bukid; ang Jerusalem ay magiging bunton ng mga guho at ang bundok ng bahay ay magiging mataas na dako ng isang gubat.’

¹⁹Ipinapatay ba siya ni Hezekias na hari ng Juda at ng buong Juda? Hindi ba't natakot siya sa PANGINOON at hiniling ang lingap ng PANGINOON, at hindi ba't nagbago ng isip ang PANGINOON tungkol sa kasamaan na kanyang ipinahayag laban sa kanila? Ngunit malapit na tayong magdala ng malaking kasamaan laban sa ating mga sarili.”

²⁰May isa pang lalaki na nagsalita ng propesiya sa pangalan ng PANGINOON, si Urias na anak ni Shemaya na taga-Kiryat-jearim. Siya'y nagsalita ng propesiya laban sa lupaing ito sa mga salitang katulad ng kay Jeremias.

²¹Nang marinig ni Haring Jehoiakim at ng lahat niyang mga mandirigma, at mga pinuno ang kanyang mga salita, pinagsikapan ng hari na ipapatay siya. Ngunit nang ito'y marinig ni Urias, siya'y natakot, tumakbo, at tumakas patungong Ehipto.

²²At si Haring Jehoiakim ay nagsugo ng mga tauhan sa Ehipto, sina Elnatan na anak ni Acbor, at ilan pang mga kasama niya.

²³Kanilang kinuha si Urias sa Ehipto, at dinala siya kay Haring Jehoiakim, na pumatay sa kanya sa pamamagitan ng tabak at itinapon ang kanyang bangkay sa mga libingan ng karaniwang tao.

²⁴Ngunit ang kamay ni Ahikam na anak ni Safan ay sumasa kay Jeremias, anupa't hindi siya naibigay sa mga kamay ng taong-bayan upang patayin.