Read Ang Biblia, 2001 Jeremias 47 Bible Online

Jeremias 47 - Ang Biblia, 2001 bible

Jeremias 47

¹Ang salita ng PANGINOON na dumating kay Jeremias na propeta tungkol sa mga Filisteo, bago sinakop ni Faraon ang Gaza.

²“Ganito ang sabi ng PANGINOON: Narito, ang mga tubig ay umaahon mula sa hilaga, at magiging nag-uumapaw na baha; ang mga ito ay aapaw sa lupain at sa lahat ng naroon, ang lunsod at ang mga naninirahan doon. Ang mga tao ay sisigaw, at bawat mamamayan sa lupain ay tatangis.

³Sa ingay ng lagapak ng mga kuko ng kanyang mga kabayo, sa hagibis ng kanyang mga karwahe, sa ingay ng kanilang mga gulong, hindi nililingon ng mga magulang ang kanilang mga anak, dahil sa kahinaan ng kanilang mga kamay,

⁴dahil sa araw na dumarating upang lipulin ang lahat ng Filisteo, upang ihiwalay sa Tiro at Sidon ang bawat kakampi na nananatili. Sapagkat nililipol ng PANGINOON ang mga Filisteo, ang nalabi sa pulo ng Crete.

⁵Ang pagiging kalbo ay dumating sa Gaza, ang Ascalon ay nagiba. O nalabi ng kanilang libis, hanggang kailan mo hihiwaan ang iyong sarili?

⁶Ah, tabak ng PANGINOON! Hanggang kailan ka hindi tatahimik? Ilagay mo ang sarili sa iyong kaluban; ikaw ay magpahinga at tumahimik!

⁷Paano ito magiging tahimik yamang ito'y inatasan ng PANGINOON? Laban sa Ascalon at laban sa baybayin ng dagat ay itinakda niya ito.”