Read Ang Biblia, 2001 Jeremias 49 Bible Online

Jeremias 49 - Ang Biblia, 2001 bible

Jeremias 49

¹Tungkol sa mga anak ni Ammon.Ganito ang sabi ng PANGINOON: “Wala bang mga anak na lalaki ang Israel? Wala ba siyang tagapagmana? Kung gayo'y bakit inagawan ni Malcam ang Gad, at ang kanyang taong-bayan ay nakatira sa mga bayan niyon?

²Kaya't, narito, ang mga araw ay dumarating, sabi ng PANGINOON, na aking iparirinig ang sigaw ng digmaan laban sa Rabba ng mga anak ni Ammon. Ito'y magiging isang bunton ng guho, at ang kanyang kabayanan[1] ay susunugin ng apoy. Kung magkagayo'y aagawan ng Israel ang mga nang-agaw sa kanya, sabi ng PANGINOON.

³“Tumangis ka, O Hesbon, sapagkat nawasak ang Ai! Umiyak kayo, mga anak na babae ng Rabba! Kayo'y magbigkis ng damit-sako, kayo'y tumaghoy at tumakbong paroo't parito sa gitna ng mga tinikan! Sapagkat si Malcam ay patungo sa pagkabihag, kasama ang kanyang mga pari at mga pinuno.

⁴Bakit mo ipinagmamalaki ang iyong mga libis, ang iyong libis ay inaanod, ikaw na taksil na anak na babae na nagtitiwala sa kanyang mga kayamanan, na sinasabi, ‘Sinong darating laban sa akin?’

⁵Narito, dadalhan kita ng takot, sabi ng Panginoong DIYOS ng mga hukbo, mula sa lahat ng nasa palibot mo; at kayo'y itataboy bawat isa sa harapan niya, at walang magtitipon sa mga takas.

⁶Ngunit pagkatapos ay panunumbalikin ko ang mga kayamanan ng mga anak ni Ammon, sabi ng PANGINOON.”

⁷Tungkol sa Edom.Ganito ang sabi ng PANGINOON ng mga hukbo: “Wala na bang karunungan sa Teman? Naglaho na ba ang payo mula sa matalino? Naparam na ba ang kanilang karunungan?

⁸Tumakas kayo, bumalik kayo, manirahan kayo sa kalaliman, O mga naninirahan sa Dedan! Sapagkat dadalhin ko ang pagkasalanta ng Esau sa kanya, sa panahon na parurusahan ko siya.

⁹Kung ang mga nag-ani ng ubas ay dumating sa iyo, hindi ba sila mag-iiwan ng mga napulot? Kung mga magnanakaw ay dumating sa gabi, hindi ba sisirain lamang nila ang sapat para sa kanilang sarili?

¹⁰Ngunit aking hinubaran ang Esau, aking inilitaw ang kanyang mga kublihan, anupa't hindi niya maikukubli ang kanyang sarili. Ang kanyang mga supling ay napuksa kasama ng kanyang mga kapatid, at ng kanyang mga kapitbahay; at siya'y wala na rin.

¹¹Iwan mo ang iyong mga ulilang anak, pananatilihin ko silang buháy, at hayaang magtiwala sa akin ang iyong mga babaing balo.”

¹²Sapagkat ganito ang sabi ng PANGINOON: “Narito, silang hindi nahatulang uminom sa kopa ay tiyak na iinom, ikaw ba'y hahayong napawalang-sala? Ikaw ay hindi hahayong napawalang-sala, kundi tiyak na iinom ka.

¹³Sapagkat ako'y sumumpa sa aking sarili, sabi ng PANGINOON, na ang Bosra ay magiging katatakutan, kakutyaan, guho, at sumpa; at ang lahat ng mga lunsod nito ay magiging wasak magpakailanman.”

¹⁴Ako'y nakarinig ng balita mula sa PANGINOON, at isang sugo ang ipinadala sa mga bansa: “Kayo'y magtipun-tipon at pumaroon laban sa kanya, at bumangon upang lumaban!”

¹⁵Sapagkat, narito, ginawa kitang maliit sa gitna ng mga bansa, at hamak sa gitna ng mga tao.

¹⁶Tungkol sa iyong kakilabutan, dinaya ka ng kapalaluan ng iyong puso, ikaw na nakatira sa mga bitak ng bato,[2] na humahawak sa kataasan ng burol. Bagaman pataasin mo ang iyong pugad na kasintaas ng sa agila, ibababa kita mula roon, sabi ng PANGINOON.

¹⁷“Ang Edom ay magiging katatakutan; bawat magdaraan doon ay mangingilabot at susutsot dahil sa lahat ng kapinsalaan nito.

¹⁸Gaya ng pagbagsak ng Sodoma at Gomorra, at ng mga karatig-bayan ng mga ito, sabi ng PANGINOON, walang sinumang mananatili roon, walang anak ng tao na maninirahan doon.

¹⁹Narito, gaya ng leon na umaahon sa gubat ng Jordan laban sa matibay na kulungan ng tupa, bigla ko silang patatakbuhing papalayo sa kanya; at hihirang ako ng mamamahala sa kanya ng sinumang aking piliin. Sapagkat sino ang gaya ko? Sinong magpapatawag sa akin? Sinong pastol ang tatayo sa harapan ko?

²⁰Kaya't inyong pakinggan ang panukalang ginawa ng PANGINOON laban sa Edom at ang mga layunin na kanyang binuo laban sa mga naninirahan sa Teman: Maging ang maliliit ng kawan ay kakaladkarin, tiyak na gagawin niyang wasak ang kanilang pastulan dahil sa kanila.

²¹Ang lupa ay nayanig sa ingay ng kanilang pagbagsak. Mayroong sigaw! Ang ingay nito ay narinig sa Dagat na Pula.

²²Narito, siya'y aahon at mabilis na lilipad na gaya ng agila, at ibubuka ang kanyang mga pakpak laban sa Bosra, at ang puso ng mga mandirigma ng Edom sa araw na iyon ay magiging gaya ng puso ng babae sa kanyang panganganak.”

²³Tungkol sa Damasco. “Ang Hamat at ang Arpad ay napahiya, sapagkat sila'y nakarinig ng masamang balita; sila'y nanlulumo, may kabalisahan sa dagat na hindi mapayapa.

²⁴Ang Damasco ay humina, siya'y tumalikod upang tumakas, at sinaklot siya ng sindak; hinawakan siya ng dalamhati at mga kalungkutan, na gaya ng babaing manganganak.

²⁵Tunay na hindi pinabayaan ang lunsod ng kapurihan, ang bayan ng aking kagalakan!

²⁶Kaya't ang kanyang mga binata ay mabubuwal sa kanyang mga lansangan, at lahat ng kanyang kawal ay matatahimik sa araw na iyon, sabi ng PANGINOON ng mga hukbo.

²⁷At ako'y magpapaningas ng apoy sa pader ng Damasco, at lalamunin niyon ang mga toreng tanggulan ni Ben-hadad.”

²⁸Tungkol sa Kedar at sa mga kaharian ng Hazor na sinalakay ni Nebukadnezar na hari ng Babilonia. Ganito ang sabi ng PANGINOON: “Bangon, sumampa kayo sa Kedar! Lipulin ninyo ang mga anak ng silangan!

²⁹Ang kanilang mga tolda at mga kawan ay kanilang kukunin, ang kanilang mga tabing at lahat nilang ari-arian; ang kanilang mga kamelyo ay aagawin sa kanila, at ang mga tao ay sisigaw sa kanila: ‘Kakilabutan sa bawat panig!’

³⁰Takbo, tumakas kayo! Manirahan kayo sa kalaliman, O mamamayan ng Hazor, sabi ng PANGINOON: Sapagkat si Nebukadnezar na hari ng Babilonia ay nagpanukala laban sa inyo, at nagpasiya laban sa inyo.

³¹“Bangon, lusubin ninyo ang bansang tiwasay, na naninirahang panatag, sabi ng PANGINOON; na walang pintuan o mga halang man, na naninirahang mag-isa.

³²At ang kanilang mga kamelyo ay sasamsamin, ang kanilang maraming kawan ay tatangayin. Aking pangangalatin sa bawat hangin ang mga gumugupit sa mga sulok ng kanilang buhok at dadalhin ko ang kanilang kapinsalaan na mula sa bawat panig nila, sabi ng PANGINOON.

³³Ang Hazor ay magiging tirahan ng mga asong mailap, walang-hanggang sira, walang sinumang mananatili roon, walang anak ng tao na maninirahan doon.”

³⁴Ang salita ng PANGINOON na dumating kay propeta Jeremias tungkol sa Elam sa simula ng paghahari ni Zedekias na hari ng Juda, na sinasabi,

³⁵Ganito ang sabi ng PANGINOON ng mga hukbo: “Narito, aking babaliin ang pana ng Elam, ang pangunahin sa kanilang kapangyarihan;

³⁶at dadalhin ko sa Elam ang apat na hangin mula sa apat na sulok ng langit at ikakalat ko sila sa lahat ng mga hanging iyon. Walang bansang hindi mararating ng mga itinaboy mula sa Elam.

³⁷Aking tatakutin ang Elam sa harapan ng kanilang mga kaaway, at sa harapan ng mga nagtatangka sa kanilang buhay. Ako'y magdadala ng kasamaan sa kanila, ang aking mabangis na galit, sabi ng PANGINOON. Ipahahabol ko sila sa tabak, hanggang sa malipol ko sila.

³⁸Pagkatapos ay ilalagay ko ang aking trono sa Elam, at lilipulin ko ang kanilang hari at mga pinuno, sabi ng PANGINOON.

³⁹“Ngunit mangyayari sa mga huling araw ay ibabalik ko ang mga kayamanan ng Elam, sabi ng PANGINOON.”