Read Ang Biblia, 2001 Hoseas 5 Bible Online

Hoseas 5 - Ang Biblia, 2001 bible

Hoseas 5

¹Pakinggan ninyo ito, O mga pari! Makinig kayo, O sambahayan ni Israel! Makinig kayo, O sambahayan ng hari! Sapagkat sa inyo nauukol ang kahatulan; sapagkat kayo'y naging isang silo sa Mizpah, at isang lambat na inilatag sa Tabor.

²Ang mga naghihimagsik ay napunta sa malalim na kapahamakan; ngunit parurusahan ko silang lahat.

³Kilala ko ang Efraim, at ang Israel ay hindi lingid sa akin; sapagkat ngayon, O Efraim, ikaw ay naging bayarang babae, ang Israel ay dinungisan ang sarili.

⁴Hindi sila pinahihintulutan ng kanilang mga gawa na manumbalik sa kanilang Diyos. Sapagkat ang espiritu ng pagiging bayarang babae ay nasa loob nila, at hindi nila nakikilala ang PANGINOON.

⁵Ang kapalaluan ng Israel ay nagpapatotoo laban sa kanya; kaya't ang Israel at Efraim ay natitisod sa kanilang pagkakasala; ang Juda'y natitisod ding kasama nila.

⁶Sila'y hahayong kasama ng kanilang kawan at ng kanilang bakahan upang hanapin ang PANGINOON; ngunit hindi nila siya matatagpuan; siya'y lumayo sa kanila.

⁷Sila'y naging taksil sa PANGINOON; sapagkat sila'y nagsilang ng mga anak sa labas. Lalamunin nga sila ng bagong buwan kasama ng kanilang mga parang.

⁸Hipan ninyo ang tambuli sa Gibea, at ang trumpeta sa Rama. Patunugin ang hudyat sa Bet-haven; tumingin ka sa likuran mo, O Benjamin.

⁹Ang Efraim ay mawawasak sa araw ng pagsaway; sa gitna ng mga lipi ng Israel ay ipinahahayag ko ang tiyak na mangyayari.

¹⁰Ang mga pinuno ng Juda ay naging gaya ng nag-aalis ng batong-pananda; sa kanila'y ibubuhos ko ang aking galit na parang tubig.

¹¹Ang Efraim ay inaapi, dinudurog sa kahatulan; sapagkat siya'y nakapagpasiyang sumunod sa utos ng tao.

¹²Kaya't ako'y parang bukbok sa Efraim at parang kabulukan sa sambahayan ni Juda.

¹³Nang makita ni Efraim ang kanyang sakit, at ni Juda ang kanyang sugat, ay nagtungo si Efraim sa Asiria, at nagsugo sa Haring Jareb. Ngunit hindi niya kayo mapapagaling, ni malulunasan man ang inyong sugat.

¹⁴Sapagkat ako'y magiging parang leon sa Efraim, at parang isang batang leon sa sambahayan ni Juda, ako, ako mismo ang pipilas at aalis; ako'y tatangay, at walang magliligtas.

¹⁵Ako'y muling babalik sa aking dako, hanggang sa kilalanin nila ang kanilang pagkakasala, at hanapin ang aking mukha. Sa kanilang pagdadalamhati ay hahanapin nila akong mainam.