Read Ang Biblia, 2001 Hoseas 7 Bible Online

Hoseas 7 - Ang Biblia, 2001 bible

Hoseas 7

¹Kapag pagagalingin ko na ang Israel, ang kasamaan nga ng Efraim ay mabubunyag, at ang masasamang gawa ng Samaria; sapagkat sila'y nandaraya, ang magnanakaw ay nanloloob, at ang mga tulisan ay nananamsam sa labas.

²Ngunit hindi nila isinasaalang-alang sa kanilang mga puso na aking tinatandaan ang lahat nilang masasamang gawa. Ngayo'y pinalilibutan sila ng kanilang sariling mga gawa; sila'y nasa harap ko.

³Kanilang pinasasaya ang hari sa pamamagitan ng kanilang kasamaan, at ng kanilang pagsisinungaling ang mga pinuno.

⁴Silang lahat ay mga mangangalunya; sila'y parang pinainit na pugon, na ang magtitinapay nito ay tumitigil sa pagpapaningas ng apoy, mula sa paggawa ng masa hanggang sa ito'y malagyan ng pampaalsa.

⁵Nang araw ng ating hari ang mga pinuno ay nagkasakit dahil sa tapang ng alak; kanyang iniunat ang kanyang kamay kasama ng mga mapanlibak.

⁶Sapagkat sila'y nagniningas tulad ng isang pugon, habang sila'y nag-aabang, ang kanilang magtitinapay ay natutulog magdamag, sa kinaumagaha'y lumalagablab na parang nagliliyab na apoy.

⁷Silang lahat ay mainit na parang pugon, at nilalamon nila ang kanilang mga hukom. Lahat ng kanilang mga hari ay nabuwal; at wala ni isa sa kanila na tumatawag sa akin.

⁸Ang Efraim ay nakikisalamuha sa mga bansa; ang Efraim ay isang tinapay na hindi binaligtad.

⁹Nilalamon ng mga dayuhan ang kanyang lakas, at hindi niya ito nalalaman; mga uban ay nakasabog sa kanya, at hindi niya ito nalalaman.

¹⁰Ang kapalaluan ng Israel ay nagpapatotoo laban sa kanya; gayunma'y hindi sila nanumbalik sa PANGINOON nilang Diyos, ni hinanap man siya, dahil sa lahat ng ito.

¹¹At ang Efraim ay parang isang kalapati, hangal at walang pang-unawa sila'y tumatawag sa Ehipto, sila'y pumupunta sa Asiria.

¹²Habang sila'y humahayo, aking ilaladlad ang aking lambat sa kanila; akin silang ibabagsak na parang mga ibon sa himpapawid; aking parurusahan sila ayon sa iniulat sa kanilang kapisanan.

¹³Kahabag-habag sila, sapagkat sila'y lumayo sa akin! Ang pagkawasak ay sumakanila, sapagkat sila'y naghimagsik laban sa akin! Tutubusin ko sana sila, ngunit nagsasalita sila ng mga kasinungalingan laban sa akin.

¹⁴Sila'y hindi dumadaing sa akin mula sa kanilang puso, kundi sila'y nananangis sa kanilang mga higaan; sila'y nagtitipon dahil sa trigo at alak; sila'y naghihimagsik laban sa akin.

¹⁵Kahit na aking sinanay at pinalakas ang kanilang mga bisig, gayunma'y nagbalak sila ng masama laban sa akin.

¹⁶Sila'y nanunumbalik, ngunit hindi sa kanya na kataas-taasan; sila'y parang mandarayang busog; ang kanilang mga pinuno ay mabubuwal sa pamamagitan ng tabak dahil sa poot ng kanilang dila. Ito ang magiging katuyaan sa kanila sa lupain ng Ehipto.