Read Ang Biblia, 2001 Amos 1 Bible Online

Amos 1 - Ang Biblia, 2001 bible

Amos 1

¹Ang mga salita ni Amos, na kasama ng mga pastol ng Tekoa, na nakita niya tungkol sa Israel nang mga araw ni Uzias na hari ng Juda, at nang mga araw ni Jeroboam na anak ni Joas na hari ng Israel, dalawang taon bago lumindol.

²At kanyang sinabi: “Ang PANGINOON ay umuungal mula sa Zion, at ipinahahayag ang kanyang tinig mula sa Jerusalem; at ang mga pastulan ng mga pastol ay nagluluksa, at ang tuktok ng Carmel ay natutuyo.”

³Ganito ang sabi ng PANGINOON: “Dahil sa tatlong pagsuway ng Damasco, at dahil sa apat, hindi ko pawawalang-bisa ang parusa, sapagkat kanilang giniik ang Gilead ng panggiik na bakal.

⁴Kaya't ako'y magsusugo ng apoy sa sambahayan ni Hazael, at tutupukin niyon ang mga tanggulan ni Ben-hadad.

⁵Aking wawasakin ang mga halang ng pintuan ng Damasco, at aking ihihiwalay ang mga naninirahan mula sa Libis ng Aven, at siyang humahawak ng setro mula sa Bet-eden; at ang bayan ng Siria ay tutungo sa pagkabihag sa Kir,” sabi ng PANGINOON.

⁶Ganito ang sabi ng PANGINOON: “Dahil sa tatlong pagsuway ng Gaza, at dahil sa apat, hindi ko pawawalang-bisa ang parusa; sapagkat kanilang dinalang-bihag ang buong bayan, upang ibigay sila sa Edom.

⁷Ngunit ako'y magsusugo ng apoy sa pader ng Gaza, at tutupukin nito ang mga tanggulan niyon.

⁸Aking ihihiwalay ang mga naninirahan mula sa Asdod, at siyang humahawak ng setro mula sa Ascalon; at aking ipipihit ang aking kamay laban sa Ekron, at ang nalabi sa mga Filisteo ay malilipol,” sabi ng Panginoong DIYOS.

⁹Ganito ang sabi ng PANGINOON: “Dahil sa tatlong pagsuway ng Tiro, at dahil sa apat, hindi ko pawawalang-bisa ang parusa, sapagkat kanilang ibinigay ang buong bayan sa Edom, at hindi inalala ang tipan ng pagkakapatiran.

¹⁰Kaya't ako'y magsusugo ng apoy sa pader ng Tiro, at tutupukin nito ang kanyang tanggulan.”

¹¹Ganito ang sabi ng PANGINOON: “Dahil sa tatlong pagsuway ng Edom, at dahil sa apat, hindi ko pawawalang-bisa ang parusa, sapagkat hinabol niya ng tabak ang kanyang kapatid, at ipinagkait ang lahat ng habag, at ang kanyang galit ay laging nangwawasak, at taglay niya ang kanyang poot magpakailanman.

¹²Ngunit magsusugo ako ng apoy sa Teman, at tutupukin nito ang mga tanggulan ng Bosra.”

¹³Ganito ang sabi ng PANGINOON: “Dahil sa tatlong pagsuway ng mga anak ni Amon, at dahil sa apat, hindi ko pawawalang-bisa ang parusa, sapagkat kanilang pinaluwa ang bituka ng mga babaing nagdadalang-tao sa Gilead, upang kanilang mapalawak ang kanilang hangganan.

¹⁴Kaya't ako'y magpapaningas ng apoy sa pader ng Rabba, at tutupukin nito ang kanyang mga tanggulan, na may sigawan sa araw ng pakikipaglaban, na may bagyo sa araw ng ipu-ipo.

¹⁵At ang kanilang hari ay tutungo sa pagkabihag, siya at ang kanyang mga pinuno na magkakasama,” sabi ng PANGINOON.