Read Ang Biblia, 2001 Mga Bilang 9 Bible Online

Mga Bilang 9 - Ang Biblia, 2001 bible

Mga Bilang 9

¹Sinabi ng PANGINOON kay Moises sa ilang ng Sinai, sa unang buwan ng ikalawang taon pagkatapos na sila'y makaalis sa lupain ng Ehipto,

²“Ipangilin ng mga anak ni Israel ang paskuwa sa takdang panahon nito.

³Sa ikalabing-apat na araw ng buwang ito, sa paglubog ng araw ay inyong ipapangilin sa kanyang takdang panahon ayon sa lahat na tuntunin niyon at ayon sa lahat ng ayos niyon ay inyong ipapangilin.”

⁴At si Moises ay nagsalita sa mga anak ni Israel upang ipangilin ang paskuwa.

⁵Kanilang ipinangilin ang paskuwa nang ikalabing-apat na araw ng unang buwan, sa paglubog ng araw, sa ilang ng Sinai. Ayon sa lahat ng iniutos ng PANGINOON kay Moises ay gayon ginawa ng mga anak ni Israel.

⁶Mayroon ngang mga lalaki na marurumi dahil sa paghawak sa bangkay ng isang tao, na anupa't hindi nila naipangilin ang paskuwa nang araw na iyon; at humarap sila kina Moises at Aaron nang araw na iyon.

⁷At ang mga lalaking iyon ay nagsabi sa kanila, “Kami ay marurumi dahil sa paghawak sa bangkay ng isang tao. Bakit kami ay pipigilin sa pag-aalay ng handog sa PANGINOON sa kanyang takdang panahon na kasama ng mga anak ni Israel?”

⁸Sinabi ni Moises sa kanila, “Maghintay kayo upang aking marinig ang ipag-uutos ng PANGINOON tungkol sa inyo.”

⁹Nagsalita ang PANGINOON kay Moises, na sinasabi,

¹⁰“Sabihin mo sa mga anak ni Israel, Kung ang sinumang tao sa inyo o sa inyong salinlahi ay maging marumi dahil sa paghawak sa isang bangkay, o nasa malayong paglalakbay ay kanyang ipapangilin din ang paskuwa sa PANGINOON.

¹¹Sa ikalabing-apat na araw ng ikalawang buwan, sa paglubog ng araw ay kanilang ipapangilin; kanilang kakainin ito kasama ng mga tinapay na walang pampaalsa at mga gulay na mapait.

¹²Wala silang ititira sa mga iyon hanggang sa kinaumagahan, ni babali ng buto niyon, ayon sa lahat ng tuntunin ng paskuwa ay kanilang ipapangilin iyon.

¹³Subalit ang lalaking malinis at wala sa paglalakbay na hindi mangingilin ng paskuwa ay ititiwalag sa kanyang bayan sapagkat siya'y hindi nag-alay ng handog sa PANGINOON sa takdang panahon, ang taong iyon ay mananagot sa kanyang kasalanan.

¹⁴Sinumang dayuhan na naninirahang kasama ninyo na nagnanais ipangilin ang paskuwa sa PANGINOON, ay gagawin niya iyon ayon sa tuntunin ng paskuwa at ayon sa batas. Kayo'y magkakaroon ng isang tuntunin para sa dayuhan at sa katutubo.”

¹⁵Nang araw na ang tabernakulo ay itayo, tinakpan ng ulap ang tabernakulo, samakatuwid ay ang tabernakulo ng patotoo. Mula sa paglubog ng araw hanggang sa kinaumagahan, iyon ay nasa ibabaw ng tabernakulo na parang anyong apoy.

¹⁶Gayon ito nagpatuloy; iyon ay tinatakpan ng ulap kapag araw, at ng anyong apoy kapag gabi.

¹⁷Tuwing ang ulap ay pumapaitaas mula sa ibabaw ng tolda, naglalakbay ang mga anak ni Israel at sa dakong tigilan ng ulap ay doon tumitigil ang mga anak ni Israel.

¹⁸Sa utos ng PANGINOON ay naglalakbay ang mga anak ni Israel, at sa utos ng PANGINOON ay tumitigil sila. Kung gaano katagal ang itigil ng ulap sa ibabaw ng tabernakulo ay siya nilang itinitigil sa kampo.

¹⁹Kahit ang ulap ay tumigil sa ibabaw ng tabernakulo ng maraming araw, sinusunod ng mga anak ni Israel ang bilin ng PANGINOON at hindi sila naglalakbay.

²⁰At kung minsan ay nananatili ng ilang araw sa ibabaw ng tabernakulo ang ulap; at ayon sa utos ng PANGINOON ay nananatili sila sa mga tolda, at ayon sa utos ng PANGINOON ay naglalakbay sila.

²¹Kung minsan ang ulap ay nananatili mula sa hapon hanggang sa kinaumagahan. Kapag ang ulap ay pumaitaas sa kinaumagahan ay naglalakbay sila. Maging araw o gabi kapag ang ulap ay pumaitaas ay naglalakbay sila.

²²Maging dalawang araw o isang buwan, o mas mahabang panahon na nakatigil ang ulap sa ibabaw ng tabernakulo na nananatili doon, ay nananatili ang mga anak ni Israel sa mga tolda at hindi naglalakbay, subalit kapag pumaitaas ay naglalakbay sila.

²³Sa utos ng PANGINOON ay nagkakampo sila, at sa utos ng PANGINOON ay naglalakbay sila. Kanilang sinunod ang bilin ng PANGINOON, ang utos ng PANGINOON sa pamamagitan ni Moises.