Read Ang Biblia, 2001 Mikas 5 Bible Online

Mikas 5 - Ang Biblia, 2001 bible

Mikas 5

¹Ngayon ay magtipun-tipon kayo sa mga hukbo, O anak na babae ng mga hukbo, sila'y naglagay ng pagkubkob laban sa atin; kanilang hahampasin ng tungkod ang pisngi ng hukom ng Israel.

²Ngunit ikaw, Bethlehem sa Efrata, na maliit upang mapabilang sa mga angkan ng Juda, mula sa iyo ay lalabas para sa akin ang isa na magiging pinuno sa Israel; na ang pinagmulan ay mula nang una, mula nang walang hanggan.

³Kaya't kanyang ibibigay sila hanggang sa panahon na siya na nagdaramdam ay manganak; kung magkagayon ang nalabi sa kanyang mga kapatid ay babalik sa mga anak ni Israel.

⁴At siya'y titindig at pakakainin ang kanyang kawan sa lakas ng PANGINOON, sa kamahalan ng pangalan ng PANGINOON niyang Diyos. At sila'y mananatili, sapagkat sa panahong iyon siya'y magiging dakila hanggang sa mga dulo ng lupa.

⁵At ang isang ito ay magiging kapayapaan. Kapag ang taga-Asiria ay sumalakay sa ating lupain, at kapag tinapakan niya ang ating mga muog, kung gayon tayo ay maglalagay laban sa kanya ng pitong pastol, at walong pinuno ng mga tao.

⁶Kanilang pamumunuan ng tabak ang lupain ng Asiria, at ang lupain ng Nimrod sa mga pasukan niyon, at kanyang ililigtas tayo sa taga-Asiria, kapag siya'y sumalakay sa ating lupain, at kapag siya'y tumapak sa ating nasasakupan.

⁷At ang nalabi sa Jacob ay magiging parang hamog na mula sa PANGINOON sa gitna ng maraming bayan, parang ulan sa damo na hindi naghihintay sa tao, ni naghihintay man sa mga anak ng tao.

⁸At ang nalabi sa Jacob ay makakasama ng mga bansa, sa gitna ng maraming bayan, parang leon sa gitna ng mga hayop sa gubat, parang batang leon sa gitna ng mga kawan ng mga tupa; na kapag siya'y dumaan, yumapak at lumapa, at walang magligtas.

⁹Itataas ang iyong kamay sa iyong mga kaaway, at lilipulin ang lahat ng iyong mga kaaway.

¹⁰At sa araw na iyon, sabi ng PANGINOON, aking aalisin sa iyo ang mga kabayo mo, at aking sisirain ang iyong mga karwahe,

¹¹at aking wawasakin ang mga lunsod ng iyong lupain, at aking ibabagsak ang lahat ng iyong tanggulan.

¹²Aalisin ko ang mga panghuhula sa iyong kamay; at hindi ka na magkakaroon ng mga manghuhula:

¹³Aalisin ko ang iyong mga larawang inanyuan at ang iyong mga haligi sa gitna ninyo, at hindi ka na sasamba sa gawa ng iyong mga kamay;

¹⁴at aking bubunutin ang iyong mga Ashera mula sa gitna mo; at aking wawasakin ang iyong mga bayan.

¹⁵Sa galit at poot ay maglalapat ako ng paghihiganti sa mga bansa na hindi nakinig.