Read Ang Biblia, 2001 Sefanias 1 Bible Online

Sefanias 1 - Ang Biblia, 2001 bible

Sefanias 1

¹Ang salita ng PANGINOON na dumating kay Sefanias na anak ni Cushi, na anak ni Gedalias, na anak ni Amarias, na anak ni Hezekias, nang mga araw ni Josias na anak ni Amon, na hari ng Juda.

²“Aking lubos na lilipulin ang lahat ng bagay sa ibabaw ng lupa,” sabi ng PANGINOON.

³“Aking pupuksain ang tao at ang hayop; lilipulin ko ang mga ibon sa himpapawid, at ang mga isda sa dagat, at ang katitisuran kasama ang masasama; aking aalisin ang sangkatauhan sa ibabaw ng lupa,” sabi ng PANGINOON.

⁴“Aking iuunat ang aking kamay laban sa Juda, at laban sa lahat ng naninirahan sa Jerusalem; at aking aalisin mula sa lugar na ito ang nalabi ni Baal, at ang mga pangalan ng mga paring sumasamba sa diyus-diyosan kasama ang mga pari;

⁵yaong mga yumuyukod sa mga bubungan sa mga bagay na nasa kalangitan; sa mga yumuyukod at sumusumpa rin sa PANGINOON at gayunma'y sumusumpa sa pangalan ni Malcam;

⁶at iyong mga tumalikod mula sa pagsunod sa PANGINOON; at ang mga hindi hinanap ang PANGINOON, ni sumangguni man sa kanya.”

⁷Tumahimik ka sa harapan ng Panginoong DIYOS! Sapagkat ang araw ng PANGINOON ay malapit na; sapagkat inihanda ng PANGINOON ang isang handog, at itinalaga ang kanyang mga panauhin.

⁸At sa araw ng paghahandog sa PANGINOON — “Aking parurusahan ang mga pinuno, at ang mga anak ng hari, at ang lahat na nagsusuot ng damit ng dayuhan.

⁹At sa araw na iyon ay aking parurusahan ang lahat ng lumulukso sa pasukan, na pinupuno ang bahay ng kanilang panginoon ng karahasan at pandaraya.”

¹⁰“At sa araw na iyon,” sabi ng PANGINOON, “maririnig ang panaghoy mula sa Pintuang Isda, ang pananambitan mula sa Ikalawang Bahagi, ang isang malakas na lagapak mula sa mga burol.

¹¹Managhoy kayo, kayong mga naninirahan sa Mortar! Sapagkat ang buong bayan ng Canaan ay nalansag; lahat ng nagtitimbang ng pilak ay inalis.

¹²At sa panahong iyon, ang Jerusalem ay sisiyasatin ko sa pamamagitan ng ilawan, at aking parurusahan ang mga tao na nagsisiupo sa kanilang mga latak, na nagsasabi sa kanilang puso, ‘Ang PANGINOON ay hindi gagawa ng mabuti, ni gagawa man siya ng masama.’

¹³At ang kanilang kayamanan ay nanakawin, at ang kanilang mga bahay ay gigibain. Bagaman sila'y nagtatayo ng mga bahay, hindi nila titirahan ang mga iyon; bagaman sila'y nagtatanim ng ubasan, hindi sila iinom ng alak niyon.”

¹⁴Ang dakilang araw ng PANGINOON ay malapit na, malapit na at napakabilis na dumarating, ang tinig ng araw ng PANGINOON, ang makapangyarihang tao ay sumisigaw nang may kapaitan roon.

¹⁵Ang araw na iyon ay araw ng pagkapoot, araw ng kaguluhan at kahapisan, araw ng pagkawasak at pagkasira, araw ng kadiliman at kalumbayan, araw ng mga ulap at makapal na kadiliman,

¹⁶araw ng tunog ng tambuli at ng hudyat ng digmaan, laban sa mga lunsod na may muog, at laban sa mataas na kuta.

¹⁷At aking dadalhan ng kahapisan ang mga tao, upang sila'y lumakad na parang mga bulag, sapagkat sila'y nagkasala laban sa PANGINOON; at ang kanilang dugo ay ibubuhos na parang alabok, at ang kanilang laman ay parang dumi.

¹⁸Kahit ang kanilang pilak o ang kanilang ginto man ay hindi makakapagligtas sa kanila sa araw ng poot ng PANGINOON. Sa apoy ng kanyang naninibughong poot ang buong lupa ay matutupok; sapagkat isang ganap at biglang paglipol ang kanyang gagawin, sa lahat ng naninirahan sa daigdig.