Read Ang Biblia, 2001 Hagai 1 Bible Online

Hagai 1 - Ang Biblia, 2001 bible

Hagai 1

¹Nang ikalawang taon ni Haring Dario, nang unang araw ng ikaanim na buwan, dumating ang salita ng PANGINOON sa pamamagitan ni propeta Hagai kay Zerubabel na anak ni Sealtiel, na gobernador ng Juda, at kay Josue na anak ni Jehozadak, na pinakapunong pari:

²“Ganito ang sabi ng PANGINOON ng mga hukbo: sinasabi ng bayang ito na hindi pa dumarating ang panahon, upang muling itayo ang bahay ng PANGINOON.”

³Nang magkagayo'y dumating ang salita ng PANGINOON sa pamamagitan ni propeta Hagai.

⁴“Panahon ba para sa inyong mga sarili na manirahan sa inyong mga bahay na may kisame, samantalang ang bahay na ito ay nananatiling wasak?

⁵Ngayo'y ganito ang sabi ng PANGINOON ng mga hukbo: Pag-isipan ninyo ang inyong mga lakad.

⁶Kayo'y naghasik ng marami ngunit umaani ng kaunti; kayo'y kumakain, ngunit hindi kayo nabubusog; kayo'y umiinom, ngunit hindi kayo nasisiyahan; kayo'y nagdaramit, ngunit walang naiinitan; at kayong tumatanggap ng sahod ay tumatanggap ng sahod upang ilagay sa supot na may mga butas.

⁷“Ganito ang sabi ng PANGINOON ng mga hukbo: Pag-isipan ninyo ang inyong mga lakad.

⁸Umahon kayo sa bundok, kumuha kayo ng kahoy, at itayo ninyo ang bahay upang kalugdan ko iyon at ako'y luwalhatiin, sabi ng PANGINOON.

⁹Kayo'y naghanap ng marami, at nakakita ng kaunti; at nang inyong dalhin sa bahay, iyon ay aking hinipan. Bakit? sabi ng PANGINOON ng mga hukbo. Dahil sa aking bahay na nananatiling wasak, samantalang tumatakbo ang bawat isa sa inyo sa kanya-kanyang sariling bahay.

¹⁰Kaya't dahil sa inyo pinipigil ng langit na nasa itaas ninyo ang hamog, at ipinagkakait ng lupa ang bunga nito.

¹¹At ako'y nagpatawag ng tagtuyot sa lupa, at sa mga burol, sa trigo, sa bagong alak, sa langis, sa mga ibinubunga ng lupa, sa mga tao at sa mga hayop, at sa lahat ng pinagpagalan.”

¹²Nang magkagayo'y si Zerubabel na anak ni Sealtiel, at si Josue na anak ni Jehozadak, na pinakapunong pari, pati ang lahat ng nalabi sa bayan, ay sumunod sa tinig ng PANGINOON nilang Diyos, at sa mga salita ni propeta Hagai, na siyang sinugo ng PANGINOON nilang Diyos; at ang bayan ay natakot sa harap ng PANGINOON.

¹³Nang magkagayo'y nagsalita si Hagai, na sugo ng PANGINOON ayon sa mensahe ng PANGINOON sa bayan, “Ako'y sumasainyo, sabi ng PANGINOON.”

¹⁴At kinilos ng PANGINOON ang diwa ni Zerubabel na anak ni Sealtiel, na gobernador ng Juda, at ang espiritu ni Josue na anak ni Jehozadak, na pinakapunong pari, at ang diwa ng buong nalabi sa bayan. Sila'y dumating at ginawa ang bahay ng PANGINOON ng mga hukbo, na kanilang Diyos,

¹⁵nang ikadalawampu't apat na araw ng ikaanim na buwan nang ikalawang taon ni Haring Dario.