Read Ang Biblia, 2001 Zacarias 9 Bible Online

Zacarias 9 - Ang Biblia, 2001 bible

Zacarias 9

¹Ang salita ng PANGINOON ay laban sa lupain ng Hadrac, at Damasco ang pahingahang dako nito. Sapagkat ang mata ng tao, pati ang lahat ng lipi ng Israel ay nasa PANGINOON,

²gayundin ang Hamat, na hangganan nito; sa Tiro at Sidon, bagaman sila'y napakarunong.

³Ang Tiro ay nagtayo ng kanyang muog, at nagbunton ng pilak na parang alabok, at ng ginto na parang putik ng lansangan.

⁴Narito, ngunit aalisan siya ng PANGINOON ng kanyang mga yaman, at ihahagis ang kanyang kayamanan sa dagat, at siya'y lalamunin ng apoy.

⁵Makikita ito ng Ascalon, at matatakot; gayundin ng Gaza, at mamimilipit sa hinagpis, gayundin ang Ekron, sapagkat ang kanyang pag-asa ay malalanta. Ang hari ay mamamatay sa Gaza, at ang Ascalon ay hindi tatahanan.

⁶Isang anak sa labas ang maninirahan sa Asdod, at aking tatapusin ang kapalaluan ng mga Filisteo.

⁷Aalisin ko ang kanyang dugo sa kanyang bibig, at ang mga kasuklamsuklam nito sa pagitan ng kanyang mga ngipin; iyon man ay magiging nalabi para sa ating Diyos; ito'y magiging gaya ng isang angkan sa Juda, ang Ekron ay magiging gaya ng Jebuseo.

⁸At ako'y magkakampo sa aking bahay dahil sa hukbo, dahil sa kanya na dumadaan, at dahil sa kanya na bumabalik; at wala nang manlulupig na daraan pa sa kanila, sapagkat ngayo'y nakita ko ng aking sariling mga mata.

⁹Magalak ka nang husto, O anak na babae ng Zion! Sumigaw ka nang malakas, O anak na babae ng Jerusalem! Narito, ang iyong hari ay dumarating sa iyo; siya'y matuwid at matagumpay, mapagpakumbaba at nakasakay sa isang asno, sa isang batang asno na anak ng asnong babae.

¹⁰Aking aalisin ang karwahe mula sa Efraim, at ang kabayo mula sa Jerusalem; at ang mga busog na pandigma ay mapuputol; at siya'y magsasalita ng kapayapaan sa mga bansa; ang kanyang nasasakupan ay magiging mula sa kabilang dagat hanggang sa dagat, at mula sa ilog hanggang sa mga dulo ng lupa.

¹¹Tungkol naman sa iyo, dahil sa dugo ng aking tipan sa iyo ay aking palalayain ang iyong mga bilanggo mula sa hukay na walang tubig.

¹²Bumalik kayo sa inyong muog, kayong mga bilanggo na may pag-asa, ngayo'y ipinahahayag ko na aking ibabalik sa inyo nang makalawa.

¹³Sapagkat aking binaluktot ang Juda bilang aking busog, ginawa ko ang Efraim na aking palaso. Gigisingin ko ang iyong mga anak, O Zion, laban sa iyong mga anak, O Grecia, at gagawin kitang parang tabak ng mandirigma.

¹⁴At ang PANGINOON ay makikita sa itaas nila; at lalabas ang kanyang pana na parang kidlat; patutunugin ng PANGINOONG Diyos ang trumpeta, at hahayo na kasama ang ipu-ipo ng timog.

¹⁵Iingatan sila ng PANGINOON ng mga hukbo; at kanilang lalamunin at tatapakan ang mga batong pantirador; at kanilang iinumin ang kanilang dugo na gaya ng alak; at sila'y mapupunong parang mga mangkok, na basang-basa na gaya ng mga sulok ng dambana.

¹⁶Ililigtas sila ng PANGINOON nilang Diyos sa araw na iyon sapagkat sila ang kawan ng kanyang bayan; sapagkat gaya ng mga bato ng isang korona ay magniningning sila sa kanyang lupain.

¹⁷Sapagkat napakalaki ng kanyang kabutihan, at napakalaki ng kanyang kagandahan! Pagiginhawahin ng trigo ang mga binata, at ng bagong alak ang mga dalaga.