Read Ang Biblia, 2001 Deuteronomio 27 Bible Online

Deuteronomio 27 - Ang Biblia, 2001 bible

Deuteronomio 27

¹Pagkatapos, si Moises at ang matatanda sa Israel ay nag-utos sa taong-bayan, na sinasabi, “Tuparin ninyo ang lahat ng utos na iniuutos ko sa iyo sa araw na ito.

²Sa araw na iyong tawirin ang Jordan patungo sa lupaing ibinibigay sa iyo ng PANGINOON mong Diyos ay maglalagay ka ng malalaking bato, at tatapalan ninyo ng plaster.

³Isusulat ninyo sa mga ito ang lahat ng mga salita ng kautusang ito kapag ikaw ay tumawid upang pumasok sa lupaing ibinibigay sa iyo ng PANGINOON mong Diyos, isang lupaing dinadaluyan ng gatas at pulot, na gaya ng ipinangako sa iyo ng PANGINOON, ng Diyos ng iyong mga ninuno.

⁴Pagtawid mo sa Jordan, ilalagay ninyo ang mga batong ito na iniuutos ko sa iyo sa araw na ito, sa bundok ng Ebal at iyong tatapalan ng plaster.

⁵Doo'y magtatayo ka ng isang batong dambana sa PANGINOON mong Diyos, na hindi gagamitan ng kasangkapang bakal.

⁶Iyong itatayo na buong bato ang dambana ng PANGINOON mong Diyos, at maghahandog ka roon ng mga handog na sinusunog sa PANGINOON mong Diyos.

⁷Ikaw ay mag-aalay ng mga handog pangkapayapaan at iyong kakainin doon; at ikaw ay magagalak sa harapan ng PANGINOON mong Diyos;

⁸at isusulat mo nang malinaw sa mga batong iyon ang lahat ng mga salita ng kautusang ito.”

⁹Si Moises at ang mga paring Levita ay nagsalita sa buong Israel, na sinasabi, “Tumahimik ka at pakinggan mo, O Israel; sa araw na ito ay naging bayan ka ng PANGINOON mong Diyos.

¹⁰Kaya't sundin mo ang tinig ng PANGINOON mong Diyos, at tuparin mo ang kanyang mga utos at ang kanyang mga tuntunin na aking iniuutos sa iyo sa araw na ito.”

¹¹Inatasan ni Moises ang bayan ng araw na iyon, na sinasabi:

¹²“Pagtawid ninyo sa Jordan, ang mga ito'y tatayo sa ibabaw ng bundok ng Gerizim upang basbasan ang bayan: Simeon, Levi, Juda, Isacar, Jose, at Benjamin;

¹³at ang mga ito'y tatayo sa ibabaw ng bundok ng Ebal upang sumumpa: Ruben, Gad, Aser, Zebulon, Dan, at Neftali.

¹⁴Ang mga Levita ay sasagot at magsasalita sa malakas na tinig sa lahat ng mga lalaki sa Israel.

¹⁵“‘Sumpain ang taong gumagawa ng larawang inukit o inanyuan, isang karumaldumal sa PANGINOON na gawa ng mga kamay ng manggagawa at lihim na inilagay sa isang dako.’ At ang buong bayan ay sasagot at magsasabi, ‘Amen.’

¹⁶“‘Sumpain ang sumisira ng puri ng kanyang ama o ng kanyang ina.’ At ang buong bayan ay magsasabi, ‘Amen.’

¹⁷“‘Sumpain ang mag-aalis ng muhon ng kanyang kapwa.’ At ang buong bayan ay magsasabi, ‘Amen.’

¹⁸“‘Sumpain ang magliligaw ng bulag sa daan.’ At ang buong bayan ay magsasabi, ‘Amen.’

¹⁹“‘Sumpain ang bumabaluktot ng katarungan para sa dayuhan, sa ulila at sa babaing balo.’ At ang buong bayan ay magsasabi, ‘Amen.’

²⁰“‘Sumpain ang sumisiping sa asawa ng kanyang ama, sapagkat kanyang inililitaw ang balabal ng kanyang ama.’ At ang buong bayan ay magsasabi, ‘Amen.’

²¹“‘Sumpain ang sumisiping sa alinmang hayop.’ At ang buong bayan ay magsasabi, ‘Amen.’

²²“‘Sumpain ang sumisiping sa kanyang kapatid na babae, sa anak ng kanyang ama, o sa anak na babae ng kanyang ina.’ At ang buong bayan ay magsasabi, ‘Amen.’

²³“‘Sumpain ang sumisiping sa kanyang biyenang babae.’ At ang buong bayan ay magsasabi, ‘Amen.’

²⁴“‘Sumpain ang pumapatay ng lihim sa kanyang kapwa.’ At ang buong bayan ay magsasabi, ‘Amen.’

²⁵“‘Sumpain ang tumatanggap ng suhol upang pumatay ng isang taong walang sala.’ At ang buong bayan ay magsasabi, ‘Amen.’

²⁶“‘Sumpain ang hindi sumasang-ayon sa mga salita ng kautusang ito upang gawin.’ At ang buong bayan ay magsasabi, ‘Amen.’