Read Ang Biblia, 2001 Deuteronomio 6 Bible Online

Deuteronomio 6 - Ang Biblia, 2001 bible

Deuteronomio 6

¹“Ngayon, ito ang utos, mga tuntunin, at mga batas, na iniutos sa akin ng PANGINOON ninyong Diyos na ituro sa inyo, upang inyong magawa ang mga ito sa lupaing inyong paroroonan upang angkinin,

²upang ikaw ay matakot sa PANGINOON mong Diyos, na iyong ingatan ang lahat niyang mga tuntunin at ang kanyang mga utos na aking iniutos sa iyo, at sa iyong anak, at sa anak ng iyong anak sa lahat ng araw ng iyong buhay; at upang ang iyong mga araw ay humaba.

³Kaya't pakinggan mo, O Israel, at iyong gawin upang ang lahat ay maging mabuti sa iyo, at upang kayo'y lalo pang dumami, na gaya ng ipinangako sa iyo ng PANGINOON, ng Diyos ng iyong mga ninuno, sa lupaing dinadaluyan ng gatas at pulot.

⁴“Pakinggan mo, O Israel: ang PANGINOON nating Diyos ay iisang PANGINOON;[1]

⁵at iibigin mo ang PANGINOON mong Diyos ng iyong buong puso, at ng iyong buong kaluluwa, at ng iyong buong lakas.

⁶Ang mga salitang ito na aking iniuutos sa iyo sa araw na ito ay ilalagay mo sa iyong puso;

⁷at iyong ituturo nang buong sikap sa iyong mga anak, at iyong sasabihin sa kanila kapag ikaw ay nakaupo sa iyong bahay, kapag ikaw ay lumalakad sa daan, at kapag ikaw ay nahihiga, at kapag ikaw ay bumabangon.

⁸At iyong itatali ang mga ito bilang tanda sa iyong kamay at bilang panali sa iyong noo.

⁹At iyong isusulat ang mga ito sa pintuan ng iyong bahay at sa mga pasukan ng inyong mga bayan.

¹⁰“Kapag dinala ka ng PANGINOON mong Diyos sa lupain na kanyang ipinangako sa iyong mga ninuno, kina Abraham, Isaac, at Jacob, upang ibigay sa iyo ang malalaki at mabubuting lunsod na hindi mo itinayo,

¹¹at mga bahay na punô ng lahat ng mabubuting bagay, na hindi mo pinunô, at mga balon na hindi mo hinukay, mga ubasan at mga puno ng olibo na hindi mo itinanim, at ikaw ay kakain at mabubusog,

¹²ingatan mo na baka iyong malimutan ang PANGINOON na naglabas sa iyo sa lupain ng Ehipto, mula sa bahay ng pagkaalipin.

¹³Matakot ka sa PANGINOON mong Diyos at maglingkod ka sa kanya at ikaw ay susumpa sa pamamagitan ng kanyang pangalan.

¹⁴Huwag kang susunod sa ibang mga diyos, sa mga diyos ng mga bansang nasa palibot mo;

¹⁵sapagkat ang PANGINOON mong Diyos na nasa gitna mo ay isang mapanibughuing Diyos; baka ang galit ng PANGINOON mong Diyos ay mag-alab laban sa iyo, at ikaw ay kanyang lipulin sa ibabaw ng lupa.

¹⁶“Huwag ninyong susubukin ang PANGINOON ninyong Diyos, gaya ng pagsubok ninyo sa kanya sa Massah.

¹⁷Masikap ninyong ingatan ang mga utos ng PANGINOON ninyong Diyos, at ang kanyang mga patotoo, at ang kanyang mga tuntunin na kanyang iniutos sa iyo.

¹⁸At iyong gagawin ang matuwid at mabuti sa paningin ng PANGINOON, para sa ikabubuti mo, at upang iyong mapasok at maangkin ang mabuting lupain na ipinangako ng PANGINOON sa iyong mga ninuno,

¹⁹upang palayasin ang lahat ng iyong mga kaaway sa harapan mo, gaya ng ipinangako ng PANGINOON.

²⁰“Kapag tatanungin ka ng iyong anak sa panahong darating, ‘Ano ang kahulugan ng mga patotoo, mga tuntunin, at mga batas, na iniutos sa inyo ng PANGINOON nating Diyos?’

²¹Iyo ngang sasabihin sa iyong anak, ‘Kami ay naging mga alipin ng Faraon sa Ehipto, at inilabas kami ng PANGINOON sa Ehipto sa pamamagitan ng makapangyarihang kamay.

²²At ang PANGINOON ay nagpakita ng mga tanda at ng mga kababalaghan, dakila at matindi, laban sa Ehipto, kay Faraon, at sa kanyang buong sambahayan, sa harapan ng aming paningin;

²³at kami ay inilabas niya mula roon upang kami ay maipasok, upang maibigay sa amin ang lupain na kanyang ipinangako sa ating mga ninuno.

²⁴At iniutos ng PANGINOON sa amin na gawin ang lahat ng mga tuntuning ito, na matakot sa PANGINOON nating Diyos, sa ikabubuti natin magpakailanman, upang ingatan niya tayong buháy, gaya sa araw na ito.

²⁵At magiging katuwiran sa atin kapag maingat nating isinagawa ang lahat ng utos na ito sa harapan ng PANGINOON nating Diyos, gaya ng iniutos niya sa atin.’