Read Ang Biblia, 2001 Mga Hukom 2 Bible Online

Mga Hukom 2 - Ang Biblia, 2001 bible

Mga Hukom 2

¹Umakyat ang anghel ng PANGINOON sa Boquim mula sa Gilgal. Kanyang sinabi, “Kayo'y pinaahon ko mula sa Ehipto, at dinala ko kayo sa lupain na aking ipinangakong ibibigay sa inyong mga ninuno. Sinabi kong, ‘Kailanma'y hindi ko sisirain ang aking tipan sa inyo,

²at huwag kayong makikipagtipan sa mga naninirahan sa lupaing ito; inyong wawasakin ang kanilang mga dambana.’ Ngunit hindi ninyo dininig ang aking utos. Ano itong ginawa ninyo?

³Kaya't sinasabi ko ngayon, Hindi ko sila palalayasin sa harap ninyo; kundi sila'y magiging mga kalaban[1] ninyo, at ang kanilang mga diyos ay magiging bitag sa inyo.”

⁴Nang sabihin ng anghel ng PANGINOON ang mga salitang ito sa lahat ng mga anak ni Israel, inilakas ng bayan ang kanilang tinig at umiyak.

⁵At kanilang tinawag ang pangalan ng dakong iyon na Boquim; at sila'y nag-alay doon sa PANGINOON.

⁶Nang mapaalis na ni Josue ang taong-bayan, pumaroon ang bawat isa sa mga anak ni Israel sa kanyang mana upang angkinin ang lupa.

⁷Naglingkod ang bayan sa PANGINOON sa lahat ng mga araw ni Josue, at sa lahat ng mga araw ng matatandang huling namatay kay Josue na nakakita ng mga dakilang bagay na ginawa ng PANGINOON para sa Israel.

⁸Si Josue na anak ni Nun, na lingkod ng PANGINOON, ay namatay sa gulang na isandaan at sampung taon.

⁹Kanilang inilibing siya sa hangganan ng kanyang mana, sa Timnat-heres, sa maburol na lupain ng Efraim na nasa hilaga ng bundok Gaas.

¹⁰Ang buong lahing iyon ay nalakip din sa kanilang mga magulang. Doon ay may ibang salinlahing bumangon pagkamatay nila na hindi kilala ang PANGINOON, ni ang mga bagay na kanyang ginawa para sa Israel.

¹¹Ginawa ng mga anak ni Israel ang masama sa paningin ng PANGINOON at naglingkod sa mga Baal.

¹²Kanilang tinalikuran ang PANGINOON, ang Diyos ng kanilang mga ninuno na naglabas sa kanila sa lupain ng Ehipto. Sumunod sila sa ibang mga diyos, sa mga diyos ng mga bayan na nasa palibot nila, at sila'y yumukod sa mga iyon; at kanilang ginalit ang PANGINOON.

¹³Kanilang tinalikuran ang PANGINOON, at naglingkod sa mga Baal at Astarte.

¹⁴Kaya't ang galit ng PANGINOON ay nag-alab laban sa Israel, at kanyang ibinigay sila sa mga manloloob. Kanyang ipinagbili sila sa mga kamay ng kanilang mga kaaway sa palibot, anupa't sila'y hindi na makatagal sa kanilang mga kaaway.

¹⁵Saan man sila humayo, ang kamay ng PANGINOON ay laban sa kanila sa ikasasama nila, gaya nang ibinabala at isinumpa sa kanila ng PANGINOON, sila'y nagipit na mabuti.

¹⁶Kaya't ang PANGINOON ay naglagay ng mga hukom na nagligtas sa kanila sa kapangyarihan ng mga nanloob sa kanila.

¹⁷Gayunma'y hindi nila pinakinggan ang kanilang mga hukom, kundi sila'y sumamba sa ibang mga diyos, at kanilang niyukuran ang mga iyon. Hindi nagtagal, sila'y lumihis sa daan na nilakaran ng kanilang mga ninuno na sumunod sa mga utos ng PANGINOON; hindi sila sumunod sa kanilang halimbawa.

¹⁸Tuwing maglalagay ng hukom ang PANGINOON para sa kanila, ang PANGINOON ay kasama ng hukom, at kanyang iniligtas sila sa kamay ng kanilang mga kaaway sa lahat ng mga araw ng hukom, sapagkat naawa ang PANGINOON dahil sa kanilang daing, dahil sa mga nagpahirap at nang-api sa kanila.

¹⁹Ngunit pagkamatay ng hukom, sila'y tumalikod at kumilos na mas masama pa kaysa kanilang mga ninuno. Sila'y sumunod sa ibang mga diyos pinaglingkuran at niyuyukuran ang mga ito. Hindi nila inihinto ang alinman sa kanilang mga gawa, ni ang kanilang mga pagmamatigas.

²⁰Kaya't ang galit ng PANGINOON ay nag-alab laban sa Israel; at kanyang sinabi, “Sapagkat sinuway ng bayang ito ang aking tipan na aking iniutos sa kanilang mga ninuno, at hindi dininig ang aking tinig.

²¹Kaya't hindi ko na palalayasin sa harap nila ang alinman sa mga bansang iniwan ni Josue nang siya'y mamatay;

²²upang sa pamamagitan nila'y aking masubok ang Israel, kung kanilang susundin o hindi ang daan ng PANGINOON upang lakaran nila, na gaya ng ginawa ng kanilang mga ninuno.”

²³Kaya't iniwan ng PANGINOON ang mga bansang iyon, sila'y hindi niya agad pinalayas, ni ibinigay sila sa kamay ni Josue.