Read Ang Bagong Ang Biblia Job 13 Bible Online

Job 13 - Ang Bagong Ang Biblia bible

Job 13

¹ "Narito, nakita ang lahat ng ito ng aking mata, ang aking tainga ay nakarinig at nakaunawa.

² Kung ano ang iyong nalalaman, ay nalalaman ko rin naman: Hindi ako mababa sa inyo.

³ Ngunit ako'y magsasalita sa Makapangyarihan sa lahat, at nais kong ipagtanggol ang aking usapin sa Diyos.

⁴ Ngunit kayo'y mapagkatha ng mga kabulaanan, kayong lahat ay mga manggagamot na walang kabuluhan.

⁵ Nawa ay tumahimik kayong lahat, at magiging inyong karunungan!

⁶ Dinggin ninyo ngayon ang aking pangangatuwiran, at ang mga pakikiusap ng aking mga labi ay inyong pakinggan.

⁷ Kayo ba'y magsasalita ng kabulaanan para sa Diyos, at mangungusap na may pandaraya para sa kanya?

⁸ Kayo ba'y magpapakita ng pagpanig sa kanya? Ipapakiusap ba ninyo ang usapin para sa Diyos?

⁹ Makakabuti ba sa inyo kapag siniyasat niya kayo? O madadaya mo ba siya tulad ng pandaraya sa isang tao?

¹⁰ Walang pagsalang sasawayin niya kayo, kung sa lihim ay magpapakita kayo ng pagtatangi.

¹¹ Hindi ba kayo tatakutin ng kanyang kamahalan, at ang sindak sa kanya ay sasainyo?

¹² Ang inyong mga di-malilimot na kasabihan ay kawikaang abo, ang inyong mga sanggalang ay mga sanggalang na putik.

¹³ "Bigyan ninyo ako ng katahimikan, at ako'y magsasalita, at hayaang dumating sa akin ang anuman.

¹⁴ Bakit kakagatin ng aking mga ngipin ang aking laman, at ilalagay ko ang aking buhay sa aking kamay?

¹⁵ Bagaman ako'y patayin niya, ako'y aasa pa rin sa kanya, gayunma'y ipagtatanggol ko ang aking mga lakad sa harapan niya.

¹⁶ Ito ang aking magiging kaligtasan, na ang isang masamang tao ay hindi haharap sa kanya.

¹⁷ Pakinggan ninyong mabuti ang mga salita ko, at sumainyong mga pakinig ang pahayag ko.

¹⁸ Narito ngayon, inihanda ko ang aking usapin; alam ko na ako'y mapapawalang sala.

¹⁹ Sino ang makikipagtalo sa akin? Sapagkat kung gayo'y tatahimik ako at mamamatay.

²⁰ Dalawang bagay lamang ang ipagkaloob mo sa akin, kung magkagayo'y hindi ako magkukubli sa iyong mukha:

²¹ iurong mo nang malayo sa akin ang kamay mo; at huwag akong takutin ng sindak sa iyo.

²² Kung magkagayo'y tumawag ka, at ako'y sasagot; o papagsalitain mo ako, at sa akin ikaw ay sumagot.

²³ Ilan ang aking mga kasamaan at mga kasalanan? Ipakilala mo sa akin ang aking pagsalangsang at ang aking kasalanan.

²⁴ Bakit mo ikinukubli ang iyong mukha, at itinuturing mo akong iyong kaaway?

²⁵ Iyo bang tatakutin ang isang dahong pinapaspas ng hangin, at ang tuyong ipa ay iyo bang hahabulin?

²⁶ Sapagkat ikaw ay sumusulat laban sa akin ng mapapait na bagay, at ipinamamana mo sa akin ang mga kasamaan ng aking kabataan.

²⁷ Iyo ring inilalagay ang aking mga paa sa kadenahan, at minamanmanan mo ang lahat kong daan, ikaw ay naglalagay ng hang-ganan sa aking talampakan.

²⁸ Bagaman ako'y parang bagay na bulok na natutunaw, na parang damit na kinakain ng bukbok.