Read Ang Bagong Ang Biblia Job 15 Bible Online

Job 15 - Ang Bagong Ang Biblia bible

Job 15

¹ Nang magkagayo'y sumagot si Elifaz na Temanita, at sinabi,

² "Sasagot ba ang isang pantas ng may mahanging kaalaman, at pupunuin ang kanyang sarili ng hanging silangan?

³ Makikipagtalo ba siya sa walang kabuluhang pag-uusap, o ng mga salita na hindi siya makakagawa ng mabuti?

⁴ Ngunit inaalis mo ang takot sa Diyos, at iyong pinipigil ang pagbubulay-bulay sa harap ng Diyos.

⁵ Sapagkat ang iyong kasamaan ang nagtuturo sa bibig mo, at iyong pinipili ang dila ng tuso.

⁶ Ang iyong sariling bibig ang humahatol sa iyo, at hindi ako; ang iyong sariling mga labi ang nagpapatotoo laban sa iyo.

⁷ "Ikaw ba ang unang tao na ipinanganak? O lumabas ka bang una kaysa mga burol?

⁸ Nakinig ka na ba sa lihim na payo ng Diyos? At iyo bang hinahangganan ang karunungan sa iyong sarili?

⁹ Anong nalalaman mo na di namin nalalaman? Anong nauunawaan mo na sa amin ay hindi malinaw?

¹⁰ Kasama namin kapwa ang mga may uban at ang matatanda, mas matanda pa kaysa iyong ama.

¹¹ Ang mga pag-aliw ba ng Diyos ay napakaliit para sa iyo, o ang salitang napakabuti sa iyo?

¹² Bakit ka napadadala sa iyong puso, at bakit kumikindat ang iyong mga mata,

¹³ na lumalaban sa Diyos ang iyong espiritu, at binibigkas mo ang ganyang mga salita sa bibig mo?

¹⁴ Ano ang tao na siya'y magiging malinis? O siyang ipinanganak ng babae, na siya'y magiging matuwid?

¹⁵ Ang Diyos ay hindi nagtitiwala sa kanyang mga banal; at ang langit ay hindi malinis sa kanyang paningin.

¹⁶ Gaano pa nga kaliit ang karumaldumal at hamak, ang taong umiinom ng kasamaan na parang tubig!

¹⁷ "Ipapakilala ko sa iyo, dinggin mo ako; at ang aking nakita ay ipahahayag ko.

¹⁸ (Ang isinaysay ng mga pantas, at hindi inilingid ng kanilang mga magulang,

¹⁹ sa mga iyon lamang ibinigay ang lupain, at walang dayuhan na dumaan sa gitna nila.)

²⁰ Ang masamang tao ay nagdaramdam ng sakit sa lahat ng kanyang araw, sa lahat ng mga taon na itinakda sa malulupit.

²¹ Ang mga nakakatakot na ugong ay nasa kanyang mga pakinig; sa kaginhawahan ay daratnan siya ng mangwawasak.

²² Siya'y hindi naniniwala na babalik siya mula sa kadiliman, at siya'y nakatakda para sa tabak.

²³ Siya'y lumalaboy dahil sa tinapay, na nagsasabi: 'Nasaan iyon?' Kanyang nalalaman na ang araw ng kadiliman ay handa sa kanyang kamay;

²⁴ kahirapan at dalamhati ang tumatakot sa kanya; sila'y nananaig laban sa kanya, na gaya ng isang hari na handa sa pakikipaglaban.

²⁵ Sapagkat iniunat niya ang kanyang kamay laban sa Diyos, at hinamon ang Makapangyarihan sa lahat;

²⁶ tumatakbo na may katigasan laban sa kanya na may makapal na kalasag;

²⁷ sapagkat tinakpan niya ang kanyang mukha ng kanyang katabaan, at nagtipon ng taba sa kanyang mga pigi;

²⁸ at siya'y tumahan sa mga sirang bayan, sa mga bahay na walang taong dapat tumahan, na nakatakdang magiging mga bunton ng guho;

²⁹ hindi siya yayaman, o mamamalagi man ang kanyang kayamanan, ni di lalawak sa lupa ang kanyang mga ari-arian.

³⁰ Siya'y hindi tatakas sa kadiliman; tutuyuin ng apoy ang kanyang mga sanga, at ang kanyang bulaklak ay tatangayin ng hangin.

³¹ Huwag siyang magtiwala sa kawalang kabuluhan, na dinadaya ang sarili; sapagkat ang kahungkagan ay magiging ganti sa kanya.

³² Ganap itong mababayaran bago dumating ang kanyang kapanahunan, at ang kanyang sanga ay hindi mananariwa.

³³ Lalagasin niya ang kanyang mga hilaw na ubas na gaya ng puno ng ubas, at lalagasin ang kanyang bulaklak na gaya ng punong olibo.

³⁴ Sapagkat ang pulutong ng masasama ay baog, at tutupukin ng apoy ang mga toldang suhulan.

³⁵ Sila'y nag-iisip ng kapilyuhan at naglalabas ng kasamaan, at naghahanda ng pandaraya ang kanilang kalooban."