Read Ang Bagong Ang Biblia Job 17 Bible Online

Job 17 - Ang Bagong Ang Biblia bible

Job 17

¹ Ang aking espiritu ay nanlulumo, ang aking mga araw ay natatapos, ang libingan ay nakahanda para sa akin.

² Tunay na may mga manunuya sa aking paligid, at ang aking mata ay nakatuon sa kanilang panggagalit.

³ "Ibigay mo ngayon ang iyong sarili sa sangla; sinong mananagot para sa akin?

⁴ Yamang iyong sinarhan ang kanilang isipan sa pag-unawa, kaya't hindi mo sila hahayaang magtagumpay.

⁵ Ang nagsasabi laban sa kanyang mga kaibigan na kunin ang bahagi ng kanilang ari-arian, ang mga mata nga ng kanyang mga anak ay manlalabo.

⁶ "Ngunit ginawa rin niya akong katatawanan ng bayan, at ako yaong sa mukha ay kanilang niluluraan.

⁷ Ang aking mata naman ay nanlabo dahil sa kalungkutan, at ang lahat ng mga bahagi ko ay parang isang anino.

⁸ Mga matuwid na tao ay matitigilan dito, at ang walang sala ay babangon laban sa masama.

⁹ Gayunma'y magpapatuloy ang matuwid sa kanyang lakad, at ang may malinis na mga kamay ay lalakas nang lalakas.

¹⁰ Ngunit tungkol sa inyong lahat, pumarito kayo ngayong muli, at hindi ako makakatagpo ng isang taong pantas sa gitna ninyo.

¹¹ Ang aking mga araw ay lumipas, ang aking mga plano ay nasira, ang mga naisin ng aking puso.

¹² Kanilang ginawang araw ang gabi, 'Ang liwanag,' wika nila, 'ay malapit sa kadiliman.'

¹³ Kung aking hanapin ang Sheol na parang aking bahay; kung aking ilatag ang aking higaan sa kadiliman,

¹⁴ kung sabihin ko sa hukay, 'Ikaw ay aking ama,' at sa uod, 'Aking kapatid na babae,' o 'Aking ina,'

¹⁵ nasaan nga ang aking pag-asa? Sinong makakakita ng aking pag-asa?

¹⁶ Lulusong ba ang mga ito sa mga rehas ng Sheol, magkasama ba kaming bababa sa alabok?"