Read Ang Bagong Ang Biblia Job 18 Bible Online

Job 18 - Ang Bagong Ang Biblia bible

Job 18

¹ Nang magkagayo'y sumagot si Bildad na Suhita, at sinabi,

² "Hanggang kailan ka maghahagilap ng mga salita? Inyong isaalang-alang, pagkatapos kami ay magsasahta.

³ Bakit kami ibinibilang na parang mga hayop? Bakit kami hangal sa iyong paningin?

⁴ Ikaw na sumisira sa iyong sarili sa iyong galit, pababayaan ba ang lupa dahil sa iyo? O aalisin ba ang bato mula sa kinaroroonan nito?

⁵ "Oo, ang ilaw ng masama ay pinapatay, at ang liyab ng kanyang apoy ay hindi nagliliwanag.

⁶ Ang ilaw ay madilim sa kanyang tolda, at ang kanyang ilawan sa itaas niya ay pinatay.

⁷ Ang kanyang malalakas na hakbang ay pinaigsi, at ang kanyang sariling pakana ang nagpabagsak sa kanya.

⁸ Sapagkat siya'y inihagis sa lambat ng kanyang sariling mga paa, at siya'y lumalakad sa silo.

⁹ Isang bitag ang humuli sa kanyang mga sakong, isang silo ang humuli sa kanya.

¹⁰ Ang lubid ay ikinubli para sa kanya sa lupa, isang patibong na para sa kanya sa daan.

¹¹ Mga nakakatakot ang tumakot sa kanya sa bawat panig, at hinahabol siya sa kanyang mga sakong.

¹² Nanlalata sa gutom ang kanyang kalakasan, at handa para sa kanyang pagbagsak ang kapahamakan!

¹³ Dahil sa karamdaman ay nauubos ang kanyang balat, lalamunin ng panganay ng kamatayan ang kanyang mga sangkap.

¹⁴ Siya'y niluray sa tolda na kanyang pinagtitiwalaan, at siya'y dinala sa hari ng mga kilabot.

¹⁵ Sa kanyang tolda ay nakatira ang di niya kaanu-ano, ang asupre ay ikinalat sa kanyang tahanan.

¹⁶ Ang kanyang mga ugat sa ilalim ay natutuyo, at sa ibabaw ay nalalanta ang kanyang sanga.

¹⁷ Ang kanyang alaala ay naglalaho sa lupa, at siya'y walang pangalan sa lansangan.

¹⁸ Siya'y itatapon mula sa liwanag tungo sa kadiliman, at itataboy sa labas ng sanlibutan.

¹⁹ Siya'y walang anak, ni apo man sa kanyang bayan, at walang nalabi sa dati niyang tinitirhan.

²⁰ Silang mula sa kanluran ay mangingilabot sa kanyang araw, at ang lagim ay babalot sa mga nasa silangan.

²¹ Tunay na ganyan ang tahanan ng mga makasalanan, sa mga hindi nakakakilala sa Diyos ay ganyan ang kalagayan."