Read Ang Bagong Ang Biblia Job 19 Bible Online

Job 19 - Ang Bagong Ang Biblia bible

Job 19

¹ At sumagot si Job, at sinabi,

² "Hanggang kailan ninyo ako pahihirapan, at pipira-pirasuhin ako ng mga salita?

³ Makasampung ulit ninyo akong pinulaan, hindi ba kayo nahihiyang gawan ako ng masama?

⁴ At kung totoo man na nagkamali ako, ay nananatili sa aking sarili ang pagkakamali ko.

⁵ Kung tunay na itinataas ninyo ang inyong sarili laban sa akin, at gawin ang aking kakutyaan bilang katuwiran laban sa akin,

⁶ alamin ninyo ngayon na inilagay ako ng Diyos sa pagkakamali, at isinara ang kanyang lambat sa paligid ko.

⁷ Narito, ako'y sumisigaw, 'Karahasan!' ngunit hindi ako pinapakinggan, ako'y humihiyaw ngunit walang katarungan.

⁸ Kanyang pinaderan ang aking daan kaya't hindi ako makaraan, siya'y naglagay ng kadiliman sa aking mga daan.

⁹ Hinubaran niya ako ng aking kaluwalhatian, at inalis ang korona sa aking ulo.

¹⁰ Kanyang inilugmok ako sa bawat dako, at ako'y pumanaw, at ang aking pag-asa ay binunot niyang parang punungkahoy.

¹¹ Kanya rin namang pinapagningas ang kanyang poot laban sa akin, at ibinilang niya ako na kanyang kaaway.

¹² Ang kanyang mga hukbo ay dumarating na magkakasama, at naglagay ng mga pangkubkob laban sa akin, at nagkampo sa palibot ng aking tolda.

¹³ "Inilayo niya ang aking mga kapatjd sa akin, at ang aking mga kakilala ay lubusang napalayo sa akin.

¹⁴ Ang aking mga kamag-anak at malapit na mga kaibigan, ay nagsilayo sa akin.

¹⁵ Kinalimutan ako ng mga panauhin sa aking bahay, itinuring akong isang dayuhan ng aking mga lingkod na kababaihan, sa kanilang paningin ako'y isang taga-ibang bayan.

¹⁶ Ako'y tumatawag sa aking lingkod, at hindi ako sinasagot, dapat ko siyang pakiusapan ng aking bibig.

¹⁷ Kakaiba ang aking hininga para sa aking asawa, at nakakainis sa mga anak ng sarili kong ina.

¹⁸ Pati mga bata ay humahamak sa akin; kapag ako'y tumayo, sila'y nagsasalita laban sa akin.

¹⁹ Lahat ng malapit kong mga kaibigan ay napopoot sa akin, at ang aking minamahal ay bumaling laban sa akin.

²⁰ Ang aking buto ay dumidikit sa aking balat at sa aking laman, at ako'y nakatakas nang bahagya lamang.

²¹ Mahabag kayo sa akin, mahabag kayo sa akin, O kayong mga kaibigan ko; sapagkat hinampas ako ng kamay ng Diyos!

²² Bakit ninyo ako tinutugis na gaya ng Diyos? At hindi pa kayo nasisiyahan sa aking laman?

²³ "O masulat nawa ngayon ang mga salita ko! O malimbag nawa sa isang aklat ang mga ito!

²⁴ Sa pamamagitan nawa ng panulat na tingga at bakal, maukit nawa ang mga ito sa bato magpakailanman!

²⁵ Sapagkat nalalaman ko na ang aking Manunubos ay nabubuhay, at sa wakas siya'y tatayo sa lupa;

²⁶ at pagkatapos na masira nang ganito ang aking balat, gayunma'y makikita ko ang Diyos sa aking laman,

²⁷ na aking makikita sa aking tabi, at mamamasdan ng aking mga mata, at hindi ng iba. Ang aking puso ay nanghihina sa loob ko!

²⁸ Kung inyong sabihin, 'Paanong aming tutugisin siya?' at, 'Ang ugat ng pangyayari ay nasumpungan sa kanya;'

²⁹ matakot kayo sa tabak, sapagkat ang poot ang nagdadala ng mga parusa ng tabak, upang inyong malaman na may paghuhukom."