Read Ang Bagong Ang Biblia Job 20 Bible Online

Job 20 - Ang Bagong Ang Biblia bible

Job 20

¹ Nang magkagayo'y sumagot si Zofar na Naamatita, at sinabi,

² "Kaya't sinasagot ako ng aking mga pag-iisip, dahil sa pagmamadali na taglay ko.

³ Aking naririnig ang saway na humihiya sa akin, at mula sa espiritu ng aking pagkaunawa ay sumasagot sa akin.

⁴ Hindi mo ba nalalaman ito nang una, mula nang ang tao'y ilagay sa lupa,

⁵ na ang pagbubunyi ng masama ay maikli, at ang kagalakan ng masasama ay sandali lamang?

⁶ Bagaman ang kanyang kataasan ay pumapailanglang hanggang sa langit, at ang kanyang ulo ay umaabot hanggang sa mga ulap;

⁷ gayunman ay matutunaw siya magpakailanman, na gaya ng kanyang sariling dumi; silang nakakita sa kanya ay magsasabi, 'Nasaan siya?'

⁸ Siya'y lilipad na papalayong gaya ng panaginip, at hindi masusumpungan. Siya'y hahabulin na parang pangitain sa gabi.

⁹ Ang mata na nakakita sa kanya ay hindi na siya makikita pa; ni mamamalas pa man siya sa kanyang lugar.

¹⁰ Hahanapin ng kanyang mga anak ang lingap ng dukha, at ang kanyang mga kamay ay magsasauli ng kanyang kayamanan.

¹¹ Ang kanyang mga buto ay puno ng lakas ng kabataan, ngunit ito'y hihiga na kasama niya sa alabok.

¹² "Bagaman ang kasamaan ay masarap sa kanyang bibig, bagaman kanyang itago sa ilalim ng kanyang dila;

¹³ bagaman ayaw niyang pakawalan, kundi iniingatan pa sa kanyang bibig;

¹⁴ gayunma'y ang kanyang pagkain ay nabago na sa kanyang tiyan, siyang kamandag ng mga ahas sa loob niya.

¹⁵ Siya'y sumakmal ng mga kayamanan, at kanyang isinusuka uli; aalisin ng Diyos ang mga iyon sa kanyang tiyan.

¹⁶ Kanyang sisipsipin ang kamandag ng mga ahas; papatayin siya ng dila ng ulupong.

¹⁷ Hindi niya titingnan ang mga ilog, ang umaagos na mga bukal ng pulot at mantekilya.

¹⁸ Kanyang isasauli ang bunga na kanyang pinagpagalan, at hindi niya lulunukin, mula sa pakinabang ng kanyang pangangalakal, hindi siya magtatamo ng kasiyahan.

¹⁹ Sapagkat kanyang dinurog at pinabayaan ang dukha; kanyang kinamkam ang isang bahay na hindi niya itinayo.

²⁰ "Sapagkat hindi nakakilala ng katahimikan ang kanyang kasakiman, hindi siya makapag-iimpok ng anuman sa kanyang kinaluluguran.

²¹ Walang naiwan pagkatapos niyang kumain; kaya't ang kanyang kasaganaan ay hindi mananatili.

²² Sa lubos niyang kasaganaan ay mapipighati sila, lahat ng lakas ng kahirapan ay darating sa kanya.

²³ Upang ganap na mapuno ang kanyang tiyan, ihuhulog ng Diyos ang kanyang mabangis na poot sa kanya, at pauulanin sa kanya bilang pagkain niya.

²⁴ Kanyang tatakasan ang bakal na sandata, isang panang tanso ang tatama sa kanya.

²⁵ Ito ay binunot, at lumabas sa kanyang katawan, Oo, ang makintab na talim ay lumalabas mula sa apdo niya; ang panghihilakbot ang dumating sa kanya.

²⁶ Lubos na kadiliman ang nakahanda para sa kanyang kayamanan; ang tutupok sa kanya ay apoy na hindi hinipan, tutupukin niyon ang sa kanyang tolda ay naiwan.

²⁷ Ihahayag ng mga langit ang kanyang kasamaan, at ang lupa ay babangon na sa kanya ay laban.

²⁸ Ang bunga ng kanyang bahay ay kukunin, sa araw ng poot ng Diyos ay kakaladkarin.

²⁹ Ito ang bahagi ng masamang tao mula sa Diyos, at ang manang itinakda sa kanya ng Diyos."