Read Ang Bagong Ang Biblia Job 22 Bible Online

Job 22 - Ang Bagong Ang Biblia bible

Job 22

¹ Nang magkagayo'y sumagot si Elifaz na Temanita, at sinabi,

² "Mapapakinabangan ba ng Diyos ang isang tao? Tunay na kapaki-pakinabang sa kanyang sarili ang matalino.

³ May kasiyahan ba sa Makapangyarihan sa lahat kung matuwid ka? O kapag pinasasakdal mo ang iyong mga lakad ay may pakinabang ba siya?

⁴ Dahil ba sa iyong takot sa kanya na ikaw ay sinasaway niya, at pumapasok siya sa paghuhukom na kasama ka?

⁵ Hindi ba malaki ang iyong kasamaan? Mga kasamaan mo'y walang hangganan.

⁶ Sapagkat kumuha ka ng sangla sa iyong kapatid kapalit ng wala, ang hubad ay hinubaran mo ng kasuotan nila.

⁷ Hindi ka nagbigay ng tubig sa pagod upang uminom, at ikaw ay nagkait ng tinapay sa gutom.

⁸ Ang makapangyarihang tao ang nagmay-ari ng lupa; at tumahan doon ang taong pinagpala.

⁹ Ang mga babaing balo ay pinaalis mong walang dala, at nadurog ang mga kamay ng mga ulila.

¹⁰ Kaya't ang mga silo ay nasa palibot mo, at biglang takot ang sumasaklot sa iyo,

¹¹ dumilim ang iyong ilaw, anupa't hindi ka makakita, at tinatabunan ka ng tubig-baha.

¹² "Hindi ba ang Diyos ay nasa itaas ng kalangitan? Masdan mo ang pinakamataas na mga bituin, sila'y napakaringal!

¹³ At iyong sinasabi, 'Ano bang nalalaman ng Diyos? Makakahatol ba siya sa kadilimang lubos?

¹⁴ Makakapal na ulap ang bumabalot sa kanya, kaya't hindi siya nakakakita; sa balantok ng langit ay lumalakad siya!'

¹⁵ Mananatili ka ba sa dating daan, na ang masasamang tao'y ito ang nilakaran?

¹⁶ Sila'y inagaw bago dumating ang kapanahunan nila; ang kanilang patibayan ay nadala ng baha.

¹⁷ Sinabi nila sa Diyos, 'Lumayo ka sa amin;' at, 'Anong magagawa sa amin ng Makapangyarihan sa lahat?'

¹⁸ Gayunma'y pinuno niya ang kanilang mga bahay ng mabubuting bagay — ngunit ang payo ng masama ay malayo sa akin.

¹⁹ Nakikita ito ng matutuwid at sila'y natutuwa; at tinatawanan sila ng walang sala na may pangungutya,

²⁰ na nagsasabi, Tiyak na malilipol ang ating mga kalaban, at tinupok ng apoy ang sa kanila'y naiwan.'

²¹ "Sumang-ayon ka sa Diyos, at ikaw ay mapapayapa; at ang mabuti ay darating sa iyo.

²² Iyong tanggapin ang turo mula sa kanyang bibig, at ilagak mo ang kanyang mga salita sa iyong puso.

²³ Kapag ikaw ay manunumbalik sa Makapangyarihan sa lahat, at magpapakumbaba ka, kung iyong ilalayo ang kasamaan mula sa iyong mga tolda,

²⁴ kapag inilagay mo ang ginto sa alabok, at ang ginto ng Ofir sa gitna ng mga bato ng mga batis,

²⁵ at kung ang iyong ginto ay ang Makapangyarihan sa lahat, at siyang iyong mahalagang pilak,

²⁶ kung gayo'y magagalak ka sa Makapangyarihan sa lahat, at ang iyong mukha sa Diyos ay iyong itataas.

²⁷ Ikaw ay dadalangin sa kanya, at kanyang diringgin ka; at iyong tutuparin ang iyong mga panata.

²⁸ Ikaw ay magpapasiya ng isang bagay, at iyon ay matatatag para sa iyo; at ang liwanag ay sisilang sa iyong mga daan.

²⁹ Sapagkat ibinababa ng Diyos ang mapagmataas, ngunit ang mapagpakumbaba ay kanyang inililigtas.

³⁰ Kanyang ililigtas ang taong walang kasalanan; maliligtas ka sa pamamagitan ng kalinisan ng iyong mga kamay."