Read Ang Bagong Ang Biblia Job 23 Bible Online

Job 23 - Ang Bagong Ang Biblia bible

Job 23

¹ Nang magkagayo'y sumagot si Job, at sinabi,

² "Ang aking sumbong ngayo'y mapait din, ang kamay niya'y mabigat sa kabila ng aking pagdaing.

³ O kung alam ko lamang kung saan ko siya matatagpuan, upang ako'y makalapit maging sa kanyang upuan!

⁴ Ilalagay ko ang aking usapin sa kanyang harapan, at pupunuin ko ang aking bibig ng mga pangangatuwiran.

⁵ Malalaman ko kung ano ang kanyang isasagot sa akin, at mauunawaan ko kung ano ang kanyang sasabihin sa akin.

⁶ Makikipagtalo ba siya sa akin sa laki ng kanyang kapangyarihan? Hindi; kundi ako'y kanyang papakinggan.

⁷ Makakapangatuwiran sa kanya ang matuwid doon; at ako'y pawawalang-sala magpakailanman ng aking hukom.

⁸ "Ako'y lumalakad pasulong ngunit wala siya roon; at pabalik, ngunit hindi ko siya maunawaan;

⁹ sa kaliwa ay hinahanap ko siya, ngunit hindi ko siya namataan, bumaling ako sa kanan, ngunit hindi ko siya mamasdan.

¹⁰ Ngunit nalalaman niya ang daang nilalakaran ko; kapag ako'y kanyang nasubok, ay lalabas akong parang ginto.

¹¹ Lubos na sumunod sa kanyang mga hakbang ang mga paa ko, ang kanyang landas ay aking iningatan, at hindi ako lumiko.

¹² Ako'y hindi humiwalay sa utos ng kanyang mga labi; pinagyaman ko ang mga salita ng kanyang bibig sa aking dibdib.

¹³ Ngunit siya'y hindi nagbabago, at sinong makakahimok sa kanya? Kung ano ang kanyang ninanasa, iyon ang kanyang ginagawa.

¹⁴ Sapagkat kanyang lulubusin ang itinakda niya para sa akin; at maraming gayong mga bagay ang nasa kanyang isipan.

¹⁵ Kaya't sa kanyang harapan ako'y nanghihilakbot; kapag aking binubulay, sa kanya ako'y natatakot.

¹⁶ Pinapanlupaypay ng Diyos ang aking puso, tinakot ako ng Makapangyarihan sa lahat;

¹⁷ gayunma'y hindi ako inihiwalay sa kadiliman, at takpan ng makapal na kadiliman ang mukha ko!