Read Ang Bagong Ang Biblia Job 26 Bible Online

Job 26 - Ang Bagong Ang Biblia bible

Job 26

¹ At sumagot si Job, at sinabi,

² "Napakalaki ng tulong mo sa kanya na walang kapangyarihan! Iniligtas mo ang kamay na walang kalakasan!

³ Napakabuti ng payo mo sa kanya na walang karunungan, at saganang ipinahayag mo ang mabuting kaalaman!

⁴ Sa kaninong tulong na ang mga salita'y iyong binigkas? At kaninong espiritu ang sa iyo'y lumabas?

⁵ Ang mga lilim ay nangangatal, at ang nasa ilalim ng tubig, pati ang mga doon ay naninirahan.

⁶ Hubad sa harapan ng Diyos ang Sheol, walang saplot ang Abadon.

⁷ Iniuunat niya ang hilaga sa ibabaw ng walang laman, at ibinibitin ang daigdig sa kawalan.

⁸ Ibinabalot niya ang tubig sa kanyang makapal na ulap, at ang ulap ay hindi nito napupunit.

⁹ Kanyang tinatakpan ang mukha ng kabilugan ng buwan, at inilaladlad ang kanyang mga ulap sa ibabaw niyon.

¹⁰ Siya'y gumuhit ng bilog sa ibabaw ng katubigan, sa hangganan ng liwanag at kadiliman.

¹¹ Ang mga haligi ng langit ay nayayanig, at natitigilan sa kanyang saway.

¹² Pinatahimik niya ang dagat sa pamamagitan ng kanyang kapangyarihan, at sa kanyang kaunawaan ay kanyang ibinuwal ang Rahab.

¹³ Sa pamamagitan ng kanyang espiritu gumanda ang kalangitan; ang tumatakas na ahas ay sinaksak ng kanyang kamay.

¹⁴ Narito, ang mga ito ay mga gilid lamang ng kanyang mga daan; at napakahinang bulong lamang ang sa kanya'y ating napapakinggan! Ngunit sinong makakaunawa sa kulog ng kanyang kapangyarihan?"