Read Ang Bagong Ang Biblia Job 27 Bible Online

Job 27 - Ang Bagong Ang Biblia bible

Job 27

¹ At muling itinuloy ni Job ang kanyang pagsasalita, at nagsabi:

² "Habang buhay ang Diyos, na siyang nag-alis ng aking karapatan, at ang Makapangyarihan sa lahat, na siyang sa kaluluwa ko'y nagpapanglaw;

³ habang nasa akin pa ang aking hininga, at ang espiritu ng Diyos ay nasa mga butas ng aking ilong;

⁴ ang aking mga labi ay hindi magsasalita ng kabulaanan, at ang aking dila ay di magsasabi ng kadayaan.

⁵ Malayo nawa sa akin na sabihing kayo'y tama; hanggang sa ako'y mamatay, hindi ko aalisin sa akin ang aking katapatan.

⁶ Ang pagiging matuwid ko ay aking pinanghahawakan at hindi ko bibitiwan, hindi ako sinisisi ng aking puso sa alinman sa aking mga araw.

⁷ "Maging gaya nawa ng masama ang aking kaaway, at ang nag-aalsa laban sa akin ay maging gaya nawa ng makasalanan.

⁸ Sapagkat ano ang pag-asa ng masasama, kapag siya'y itiniwalag ng Diyos, kapag kinuha ng Diyos ang kanyang buhay?

⁹ Diringgin ba ng Diyos ang kanyang pagdaing, kapag ang kabagabagan sa kanya ay dumating?

¹⁰ Sa Makapangyarihan sa lahat siya kaya'y masisiyahan? Tatawag kaya siya sa Diyos sa lahat ng kapanahunan?

¹¹ Ang tungkol sa kamay ng Diyos sa inyo'y aking ituturo; kung anong nasa Makapangyarihan sa lahat ay hindi ko itatago.

¹² Ito'y mismong nasaksihan ninyong lahat, bakit nga kayo ay lubos na nawalan ng kabuluhan?

¹³ "Ito ang bahagi ng masamang tao sa Diyos, at ang manang tinatanggap ng mga nang-aapi mula sa Makapangyarihan sa lahat.

¹⁴ Kung dumami ang kanyang mga anak, iyon ay para sa tabak, at ang kanyang supling ay hindi magkakaroon ng sapat na pagkain.

¹⁵ Ang kanyang mga naiwan ay ililibing ng salot, at ang kanyang mga balo ay hindi nananaghoy.

¹⁶ Bagaman siya'y magbunton ng pilak na parang alabok, at magparami ng damit na parang luwad;

¹⁷ mapaparami niya iyon, ngunit ang matuwid ang magsusuot niyon, at paghahatian ng walang sala ang pilak na natipon.

¹⁸ Gaya ng sapot ng gagamba ang itinatayo niyang bahay, gaya ng isang kubol na ginagawa ng isang bantay.

¹⁹ Siya'y nahihigang mayaman, ngunit hindi na niya iyon magagawa, imumulat niya ang kanyang mga mata, ngunit ang kanyang kayamanan ay nawala.

²⁰ Inaabutan siya ng pagkasindak na gaya ng baha, sa gabi'y ipu-ipo ang tumatangay sa kanya.

²¹ Tinatangay siya ng hanging silangan, at siya'y nawawala, pinapalis siya sa kinaroroonan niya.

²² Ito'y humahampas sa kanya nang walang kaawaan; at pinagsikapan niyang tumakas mula sa kanyang kapangyarihan.

²³ Ipinapalakpak nito ang kanyang mga kamay sa kanya, at sinisigawan siya mula sa kinaroroonan nito.