Read Ang Bagong Ang Biblia Job 34 Bible Online

Job 34 - Ang Bagong Ang Biblia bible

Job 34

¹ At sumagot si Elihu, at sinabi,

² "Pakinggan ninyo ang aking mga salita, kayong mga matatalino; kayong mga nakakaalam, pakinggan ninyo ako;

³ sapagkat ang tainga ang sumusubok sa mga salita, gaya ng ngalangala na sa pagkain ay lumalasa.

⁴ Piliin natin kung ano ang matuwid; ating alamin sa ating mga sarili kung ano ang mabuti.

⁵ Sapagkat sinabi ni Job, 'Ako'y walang kasalanan, at inalis ng Diyos ang aking karapatan;

⁶ itinuring akong sinungaling sa kabila ng aking katuwiran, at ang sugat ko'y walang lunas bagaman ako'y walang pagsuway.'

⁷ Sinong tao ang katulad ni Job, na ang panunuya ay tila tubig na iniinom,

⁸ na nakikisama sa mga gumagawa ng masama, at lumalakad na kasama ng taong masasama?

⁹ Sapagkat kanyang sinabi, 'Ang tao'y walang mapapakinabang, kung ang Diyos ay kanyang kalugdan.'

¹⁰ "Kaya't dinggin ninyo ako, kayong mga lalaking may unawa, malayo nawa sa Diyos na siya'y gumawa ng masama, at sa Makapangyarihan sa lahat, na ang kamalian ay kanyang magawa.

¹¹ Sapagkat sisingilin niya ang tao ayon sa kanyang gawa, at kanyang igagawad sa bawat tao ang ayon sa mga lakad niya.

¹² Sa katotohanan, ang Diyos ay hindi gagawa ng kasamaan, at hindi babaluktutin ng Makapangyarihan sa lahat ang katarungan.

¹³ Sinong nagbigay sa kanya ng pamamahala sa lupa? O sinong naglagay ng buong sanlibutan sa kanya?

¹⁴ Kung ibabalik niya ang kanyang diwa sa sarili niya, at titipunin sa kanyang sarili ang kanyang hininga;

¹⁵ lahat ng laman ay magkakasamang mamamatay, at babalik sa alabok ang sangkatauhan.

¹⁶ "Kung mayroon kang pangunawa ay dinggin mo ito; ang aking sinasabi ay pakinggan mo.

¹⁷ Mamamahala ba ang namumuhi sa katarungan? Parurusahan mo ba ang ganap at makapangyarihan,

¹⁸ na nagsasabi sa isang hari: 'Walang kuwentang tao,' at sa mga maharlika: 'Masamang tao;'

¹⁹ na hindi nagpapakita ng pagtatangi sa mga pinuno, ni pinapahalagahan man nang higit kaysa mahirap ang mayaman, sapagkat silang lahat ay gawa ng kanyang mga kamay?

²⁰ Sa isang sandali sila'y namamatay; sa hatinggabi ang taong-bayan ay inuuga at pumapanaw, at ang makapangyarihan ay inaalis, ngunit hindi ng kamay ng tao.

²¹ "Sapagkat ang kanyang mga mata ay nasa lakad ng tao, at nakikita niya ang lahat ng mga hakbang nito.

²² Walang dilim ni malalim na kadiliman, na mapagtataguan ng mga gumagawa ng kasamaan.

²³ Sapagkat hindi pa siya nagtalaga para sa tao ng panahon, upang siya'y humarap sa Diyos sa paghuhukom.

²⁴ Kanyang dinudurog ang malakas kahit walang pagsisiyasat, at naglalagay ng iba na kanilang kahalili.

²⁵ Kaya't palibhasa'y alam niya ang kanilang mga gawa, kanyang dinadaig sila sa gabi, at sila'y napupuksa.

²⁶ Kanyang hinahampas sila dahil sa kanilang kasamaan sa paningin ng mga tao,

²⁷ sapagkat sila'y lumihis sa pagsunod sa kanya, at hindi pihahalagahan ang anuman sa mga lakad niya,

²⁸ anupa't pinarating nila ang daing ng dukha sa kanya, at ang daing ng napipighati ay narinig niya —

²⁹ sino ngang makakahatol kapag tahimik siya? Kapag ikinukubli niya ang kanyang mukha, sinong makakatingin sa kanya? Maging ito'y isang tao o isang bansa? —

³⁰ upang huwag maghari ang taong walang diyos, upang ang bayan ay hindi niya malinlang.

³¹ "Sapagkat sa Diyos ay may nakapagsabi na ba, 'Ako'y nagpasan na ng parusa; hindi na ako magkakasala pa;

³² ituro mo sa akin yaong hindi ko nakikita, kung ako'y nakagawa ng kasamaan, hindi ko na ito gagawin pa?'

³³ Gagantihin ka ba niya nang nababagay sa iyo, sapagkat ito ay iyong tinanggihan? Sapagkat ikaw ang marapat pumili at hindi ako; kaya't ipahayag mo kung ano ang iyong nalalaman.

³⁴ Sasabihin sa akin ng mga taong may kaunawaan, at ang mga pantas na nakikinig sa akin ay magsasaysay:

³⁵ 'Si Job ay nagsasalita nang walang kaalaman, ang kanyang mga salita ay walang karunungan.'

³⁶ Si Job nawa'y litisin hanggang sa katapusan, sapagkat siya'y sumasagot na gaya ng mga taong tampalasan.

³⁷ Sapagkat dinaragdagan niya ng paghihimagsik ang kanyang kasalanan, ipinapalakpak niya ang kanyang mga kamay sa ating kalagitnaan, at ang mga salita niya laban sa Diyos ay kanyang lalong dinaragdagan."