Read Ang Bagong Ang Biblia Job 35 Bible Online

Job 35 - Ang Bagong Ang Biblia bible

Job 35

¹ At si Elihu ay sumagot at sinabi,

² "Iniisip mo bang ito'y makatuwiran? Sinasabi mo bang, 'Sa harapan ng Diyos ito'y aking karapatan,'

³ na iyong tinatanong, 'Ano bang iyong kalamangan? Paanong mas mabuti ako kung ako'y nakagawa ng kasalanan?'

⁴ Sasagutin kita at ang iyong mga kaibigang kasama mo.

⁵ Tumingala ka sa langit at tingnan mo; at masdan mo ang mga ulap, na mas mataas kaysa iyo.

⁶ Kung ikaw ay nagkasala, anong iyong nagawa laban sa kanya? At kung ang iyong mga pagsuway ay dumarami, anong iyong ginagawa sa kanya?

⁷ Kung ikaw ay matuwid, anong sa kanya'y iyong ibinibigay; o ano bang tinatanggap niya mula sa iyong kamay?

⁸ Ang iyong kasamaan ay nakakapinsala sa ibang gaya mo; at ang iyong katuwiran, ay sa ibang mga tao.

⁹ "Dahil sa dami ng mga kaapihan, ang mga tao'y sumisigaw; sila'y humihingi ng saklolo dahil sa kamay ng makapangyarihan.

¹⁰ Ngunit walang nagsasabing, 'Nasaan ang Diyos na sa akin ay lumalang, na siyang nagbibigay ng awit sa kinagabihan,

¹¹ na siyang nagtuturo sa atin ng higit kaysa mga hayop sa daigdig, at ginagawa tayong mas matatino kaysa mga ibon sa himpapawid?'

¹² Tumatawag sila roon, ngunit siya'y hindi sumasagot, dahil sa kapalaluan ng mga taong buktot.

¹³ Tunay na hindi pinapakinggan ng Diyos ang walang kabuluhang karaingan, ni pinapahalagahan man ito ng Makapangyarihan sa lahat.

¹⁴ Lalo pa nga kung iyong sinasabing hindi mo siya nakikita, na ang usapin ay nasa harap niya, at iyong hinihintay siya!

¹⁵ At ngayon, sapagkat ang galit niya'y hindi nagpaparusa, at ang kasamaan ay hindi niya sinusunod,

¹⁶ ibinubuka ni Job ang kanyang bibig sa walang kabuluhan, siya'y nagpaparami ng mga salita na walang kaalaman.