Read Ang Bagong Ang Biblia Job 36 Bible Online

Job 36 - Ang Bagong Ang Biblia bible

Job 36

¹ Si Elihu ay nagpatuloy, at nagsabi,

² "Pagtiisan mo ako nang kaunti at sa iyo'y aking ipapakita, sapagkat alang-alang sa Diyos ako'y mayroong masasabi pa.

³ Dadalhin ko mula sa malayo ang aking kaalaman, at bibigyan ko ng katuwiran ang sa akin ay Maylalang.

⁴ Sapagkat tunay na hindi kasinungalingan ang mga salita ko; siyang sakdal sa kaalaman ay kasama mo.

⁵ "Tunay na ang Diyos ay makapangyarihan at hindi humahamak sa kanino man; sa lakas ng unawa, siya'y makapangyarihan.

⁶ Ang masama ay hindi niya pinananatiling buhay, ngunit sa napipighati ay ibinibigay niya ang kanilang karapatan.

⁷ Hindi niya inaalis ang kanyang mga mata sa matuwid; kundi kasama ng mga hari sa trono, kanyang itinatatag sila magpakailanman, at sila'y pinararangalan.

⁸ At kung sila'y matanikalaan, at masilo ng mga tali ng kapighatian;

⁹ inilalahad nga niya sa kanila ang kanilang gawa at ang kanilang mga pagsuway, na sila'y nag-uugaling may kayabangan.

¹⁰ Binubuksan niya ang kanilang pandinig sa aral, at iniuutos na sila'y bumalik mula sa kasamaan.

¹¹ Kung sila'y makinig at maglingkod sa kanya, gugugulin nila ang kanilang mga araw sa kasaganaan, at ang kanilang mga taon sa kasayahan.

¹² Ngunit kung hindi sila makinig, sila'y mamamatay sa tabak, at sila'y walang kaalamang mapapahamak.

¹³ "Ang masasama ang puso, galit ay kinukuyom, kapag kanyang tinatalian sila, hindi sila humihingi ng tulong.

¹⁴ Sila'y namamatay sa kabataan, at ang buhay nila'y natatapos sa piling ng mahalay na lalaki.

¹⁵ Inililigtas niya ang mga dukha sa kanilang kahirapan, at binubuksan ang kanilang mga pandinig sa kasawian.

¹⁶ Inakit ka rin niya mula sa kabalisahan, patungo sa maluwag na dako na walang pilitan; at ang nakahain sa iyong hapag ay puno ng katabaan.

¹⁷ "Ngunit ikaw ay puspos ng paghatol sa masamang tao; kahatulan at katarungan ang humahawak sa iyo.

¹⁸ Mag-ingat ka baka ikaw ay akitin ng poot upang mangutya, huwag hayaang sa kalakhan ng pantubos ikaw ay mawala.

¹⁹ Mananaig ba ang iyong sigaw upang malayo ka sa kaguluhan, o ang lahat ng puwersa ng iyong kalakasan?

²⁰ Ang gabi ay huwag mong pakaasahan, kung kailan ang mga bayan ay inaalis sa kanilang kinalalagyan.

²¹ Mag-ingat ka, huwag kang bumaling sa kasamaan; sapagkat ito ang iyong pinili sa halip na kahirapan.

²² Tingnan mo, ang Diyos ay itinataas sa kapangyarihan niya; sinong tagapagturo ang gaya niya?

²³ Sinong nag-utos sa kanya ng kanyang daan? O sinong makapagsasabi, 'Ikaw ay gumawa ng kamalian?'

²⁴ "Alalahanin mong dakilain ang kanyang gawa, na inawit ng mga tao.

²⁵ Napagmasdan iyon ng lahat ng mga tao; natatanaw ito ng tao mula sa malayo.

²⁶ Narito, ang Diyos ay dakila, at hindi natin siya kilala, hindi masukat ang bilang ng mga taon niya.

²⁷ Sapagkat ang mga patak ng tubig ay kanyang pinapailanglang, kanyang dinadalisay ang kanyang ambon sa ulan,

²⁸ na ibinubuhbs ng kalangitan, at ipinapatak ng sagana sa sangkatauhan.

²⁹ May makakaunawa ba ng pagkalat ng mga ulap, ng mga pagkulog sa kanyang tolda?

³⁰ Narito, ang kanyang kidlat sa palibot niya'y kanyang ikinakalat, at tinatakpan niya ang mga ugat ng dagat

³¹ Sapagkat sa pamamagitan ng mga ito'y hinahatulan niya ang mga bayan; saganang pagkain ay kanyang ibinibigay.

³² Tinatakpan niya ng kidlat ang kanyang mga kamay; at inuutusan ito na ang tanda'y patamaan.

³³ Ang pagsiklab niyon tungkol sa kanya'y nagsasaysay, na naninibughong may galit laban sa kasamaan.