Read Ang Bagong Ang Biblia Job 39 Bible Online

Job 39 - Ang Bagong Ang Biblia bible

Job 39

¹ "Alam mo ba kung kailan nanganganak ang mga kambing sa kabundukan? Ang pagsilang ng mga usa ay iyo bang napagmasdan?

² Mabibilang mo ba ang mga buwan ng kanilang kagampanan, o alam mo ba kung kailan ang kanilang pagsisilang,

³ kapag sila'y yumuko, ang kanilang mga anak ay iniluluwal, at ang kanilang sanggol ay isinisilang?

⁴ Ang kanilang mga anak ay nagiging malakas, sa kaparangan sila'y lumalaki, sila'y humahayo at sa kanila'y hindi na bumabalik muli.

⁵ "Sinong nagpakawala sa asnong mabangis? Sinong nagkalag ng mga tali ng asnong mabilis?

⁶ Na ginawa kong bahay niya ang ilang, at ang lupang maasin na kanyang tahanan?

⁷ Nililibak nito ang ingay ng bayan, ang sigaw ng nagpapatakbo ay di nito napapakinggan.

⁸ Nililibot niya ang mga bundok bilang kanyang pastulan, at naghahanap siya ng bawat luntiang bagay.

⁹ "Payag ba ang torong mailap na ikaw ay paglingkuran? Magpapalipas ba siya ng gabi sa iyong sabsaban?

¹⁰ Matatalian mo ba siya ng lubid sa tudling, ang mga libis sa likuran mo ay kanya bang bubungkalin?

¹¹ Aasa ka ba sa kanya, dahil siya'y lubhang malakas? At ang iyong gawain sa kanya ba'y iaatas?

¹² May tiwala ka ba sa kanya na siya'y babalik, at dadalhin ang mga butil sa iyong lugar ng paggiik?

¹³ "Ang pakpak ng avestruz ay may pagmamalaking kumakampay, ngunit ang mga iyon ba'y mga pakpak at balahibo ng pagmamahal?

¹⁴ Sapagkat iniiwan niya sa lupa ang kanyang mga itlog, at pinaiinit ang mga iyon sa alabok,

¹⁵ na kinalilimutang baka mapisa ang mga iyon ng paa, o ang mailap na hayop ay yumurak sa kanila.

¹⁶ Malupit siya sa kanyang mga sisiw, na parang sila ay hindi kanya; bagaman ang kanyang gawa ay mawalang kabuluhan, hindi siya nangangamba;

¹⁷ sapagkat ipinalimot sa kanya ng Diyos ang karunungan, at hindi siya binahaginan ng kaunawaan.

¹⁸ Kapag siya'y tumatayo upang tumakbo, tinatawanan niya ang kabayo at ang sakay nito.

¹⁹ "Binibigyan mo ba ang kabayo ng kanyang kapangyarihan? Binibihisan mo ba ang kanyang leeg ng kalakasan?

²⁰ Pinalulukso mo ba siya na parang balang? Ang maharlika niyang pagbahin ay kagimbal-gimbal.

²¹ Siya'y kumakahig sa libis, at nagagalak sa lakas niya, siya'y lumalabas upang harapin ang mga sandata.

²² Tinatawanan niya ang pagkatakot at hindi siya nanlulupaypay; ang tabak ay hindi niya tinatalikuran.

²³ Tumutunog sa kanya ang suksukan ng pana, ang makintab na sibat at ang sibat na mahaba.

²⁴ May bangis at galit na sinasakmal niya ang lupa, hindi siya makatayong tahimik sa tunog ng trumpeta.

²⁵ Kapag tumutunog ang trumpeta, ay sinasabi niya, 'Aha!' At kanyang naaamoy ang labanan mula sa kalayuan, ang ingay ng mga kapitan at ang sigawan.

²⁶ "Lumilipad ba ang uwak sa pamamagitan ng iyong karunungan, at ibinubuka ang kanyang mga pakpak sa dakong timugan?

²⁷ Sa pamamagitan ba ng iyong utos pumapailanglang ang agila, at siya'y gumagawa sa itaas ng pugad niya?

²⁸ Siya'y naninirahan sa malaking bato, at ginagawa itong tahanan, sa tuktok ng burol na batuhan.

²⁹ Mula roo'y nag-aabang siya ng mabibiktima, mula sa malayo'y nakikita ito ng kanyang mga mata.

³⁰ Sumisipsip ng dugo ang mumunting mga anak niya; at kung saan naroon ang pinatay, ay naroroon siya."