Read Ang Bagong Ang Biblia Job 40 Bible Online

Job 40 - Ang Bagong Ang Biblia bible

Job 40

¹ At sumagot ang PANGINOON kay Job at sinabi:

² "Ang mapaghanap ng kamalian ay makikipagtalo ba sa Makapangyarihan sa lahat? Siyang nakikipagtalo sa Diyos, ay sagutin niya ito."

³ Nang magkagayo'y sumagot si Job sa PANGINOON, at nagsabi,

⁴ "Narito, ako'y walang kabuluhan; anong isasagot ko sa iyo? Aking inilalagay ang aking kamay sa bibig ko,

⁵ minsan ay nagsalita ako, at hindi ako tutugon; makalawa, at hindi na ako magpapatuloy."

⁶ Nang magkagayo'y sumagot ang PANGINOON kay Job mula sa ipu-ipo:

⁷ "Tulad sa isang lalaki'y magbigkis ka ng iyong baywang; tatanungin kita, at sa akin ay iyong ipaalam.

⁸ Pati ba ako'y ilalagay mo sa kamalian? Upang ikaw ay ariing ganap ako ba’y iyong hahatulan?

⁹ Mayroon ka bang kamay na tulad sa Diyos? Makakapagpakulog ka ba ng tinig na gaya niya?

¹⁰ "Maggayak ka ngayon ng karilagan at karangalan, magbihis ka ng kaluwalhatian at karingalan.

¹¹ Ang pag-uumapaw ng iyong galit ay ibuhos mong lahat, tunghayan mo ang bawat palalo, at siya'y gawin mong hamak.

¹² Masdan mo ang bawat mayabang, at pababain mo siya; at yapakan mo ang masama sa kinatatayuan nila.

¹³ Silang lahat sa alabok ay sama-samang itago mo; talian mo ang kanilang mukha sa lihim na dako.

¹⁴ Kung magkagayo'y kikilalanin ko sa iyo, na mabibigyan ka ng tagumpay ng kanang kamay mo.

¹⁵ "Masdan mo, ang Behemot na aking ginawa kung paanong ika'y aking ginawa; siya'y kumakain ng damo na gaya ng baka.

¹⁶ Masdan mo, ang lakas niya'y nasa kanyang mga balakang, at ang kapangyarihan niya'y nasa kalamnan ng kanyang tiyan.

¹⁷ Pinapatigas niya ang kanyang buntot na sedro ang katulad, ang mga litid ng kanyang mga hita ay magkakalapat.

¹⁸ Mga tubong tanso ang mga buto niya, parang mga baretang bakal ang kanyang mga paa.

¹⁹ "Sa mga gawa ng Diyos ang pangunahin ay siya; tanging ang lumalang sa kanya, ang makapaglalapit ng kanyang espada!

²⁰ Sapagkat ang nagbibigay sa kanya ng pagkain ay ang mga bundok na doo'y naglalaro ang lahat ng maiilap na hayop.

²¹ Sa lilim ng punong lotus siya'y nahihimlay, sa puwang ng mga tambo, at sa mga latian.

²² Ang mga puno ng lotus, siya'y lumililim; ang mga sangang batis sa kanya'y nakapaligid.

²³ Narito, hindi siya natatakot kung ang ilog man ay nagngangalit; siya'y tiwasay bagaman rumagasa ang Jordan sa kanyang bibig.

²⁴ Mayroon bang makakakuha sa kanya sa pamamagitan ng kanyang mga mata, o matutuhog ang kanyang ilong ng isang silo?