Read Ang Bagong Ang Biblia Job 41 Bible Online

Job 41 - Ang Bagong Ang Biblia bible

Job 41

¹ "Mahuhuli mo ba ang Leviatan sa pamamagitan ng bingwit? O mailalabas mo ba ang kanyang dila sa pamamagitan ng lubid?

² Makapaglalagay ka ba sa kanyang ilong ng isang lubid? O mabubutas ang kanyang panga ng isang kawit?

³ Makikiusap ba siya ng marami sa iyo? O magsasalita ba siya sa iyo ng mga salitang malumanay?

⁴ Makikipagtipan ba siya sa iyo, upang maging alipin mo magpakailannian?

⁵ Makikipaglaro ka ba sa kanya na gaya sa isang ibon? O tatalian mo ba siya para sa iyong kadalagahan?

⁶ Makikipagtawaran ba para sa kanya ang mga mangangalakal? Sa mga negosyante siya kaya'y paghahatian?

⁷ Mahihiwa mo ba ng patalim na bakal ang kanyang balat, o ang kanyang ulo ng sa isda ay pangsibat?

⁸ Pagbuhatan mo siya ng kamay; isipin mo ang paglalaban, at hindi mo na ito gagawin kailanman!

⁹ Narito, ang pag-asa ng tao ay nabibigo, siya'y pinabababa kahit makita lamang niya ito.

¹⁰ Walang napakabagsik upang mangahas na siya'y mapagalaw, sino ngayon siya na makakatayo sa aking harapan?

¹¹ Sinong nagbigay sa akin, na dapat ko siyang bayaran? Sa akin ang anumang nasa silong ng buong kalangitan.

¹² "Hindi ako tatahimik tungkol sa kanyang mga bisig, ni sa kanya mang dakilang kapangyarihan, ni sa kanya mang mainam na hugis.

¹³ Sinong makapaghuhubad ng kanyang damit na panlabas? Sinong makatatagos sa kanyang dobleng damit-kalasag?

¹⁴ Sinong makapagbubukas ng mga pinto ng kanyang mukha? Pagkasindak ang nasa palibot ng ngipin niya.

¹⁵ Ang kanyang likod ay gawa sa hanay ng mga kalasag na pinagdikit tulad sa isang pantatak.

¹⁶ Ang isa'y napakalapit sa iba pa, anupa't walang hangin na makaraan sa pagitan nila.

¹⁷ Ang isa't isa'y magkakabit, hindi maihihiwalay, pagka't nagkakalakip.

¹⁸ Ang kanyang mga pagbahin ay nagsisiklab ng tanglaw, at ang kanyang mga mata ay gaya ng talukap mata ng bukang-liwayway.

¹⁹ Sa bibig niya'y lumalabas ang nagliliyab na sulo; mga alipatong apoy ay nagsisilukso.

²⁰ Sa mga butas ng kanyang ilong may usok na lumalabas, gaya ng mula sa isang kumukulong kaldero at mga talahib na nagniningas.

²¹ Nagpapaningas ng mga uling ang kanyang hininga, at may apoy na lumalabas sa bibig niya.

²² Sa kanyang leeg ay nananatili ang kalakasan, at ang sindak ay sumasayaw sa kanyang harapan.

²³ Ang mga kaliskis ng kanyang laman ay magkakadikit, matibay ang pagkakabit sa kanya at hindi maaalis.

²⁴ Kasintigas ng bato ang kanyang puso, matigas na gaya ng panggiling na bato.

²⁵ Kapag siya'y tumitindig ang mga makapangyarihan ay natatakot, nawawala sila sa sarili dahil sa kanyang kalabog.

²⁶ Kahit na tamaan siya ng tabak, ito ay hindi tumatalab; ni ng sibat man, ng palaso, ni ng mahabang pangsibat.

²⁷ Itinuturing niyang parang dayami ang bakal, at ang tanso ay parang bulok na kahoy lamang.

²⁸ Hindi siya mapapatakbo ng palaso, sa kanya'y nagiging pinaggapasan ang mga pantirador na bato.

²⁹ Ang mga pamalo ay itinuturing na pinaggapasan, ang langitngit ng mga sibat ay kanyang tinatawanan.

³⁰ Ang kanyang mga sangkap sa ibaba ay gaya ng matatalas na bibinga; parang paragos ng giikan kung siya'y bumubuka.

³¹ Kanyang pinakukulo ang kalaliman na parang palayok; ginagawa niya ang dagat na parang isang palayok ng pamahid na gamot.

³² Sa likuran ay nag-iiwan siya ng bakas na kumikinang, aakalain ng sinuman na ubanin ang kalaliman.

³³ Walang gaya niya sa ibabaw ng lupa, isang walang takot na nilikha.

³⁴ Kanyang minamasdan ang bawat mataas na bagay; siya'y hari sa lahat ng mga anak ng kapalaluan."