Read Ang Bagong Ang Biblia Job 5 Bible Online

Job 5 - Ang Bagong Ang Biblia bible

Job 5

¹ "Tumawag ka ngayon; may sasagot ba sa iyo? At kanino sa mga banal ka babaling?

² Tunay na pinapatay ng pagkayamot ang taong hangal, at pinapatay ng panibugho ang mangmang.

³ Nakakita na ako ng hangal na nag-uugat, ngunit bigla kong sinumpa ang kanyang tirahan.

⁴ Ang mga anak niya ay malayo sa kaligtasan, sila'y dinudurog sa pintuan at walang magligtas sa kanila isa man.

⁵ Ang kanyang ani ay kinakain ng gutom, at kinukuha niya ito maging mula sa mga tinik, at ang bitag ay naghahangad sa kanilang kayamanan.

⁶ Sapagkat ang paghihirap ay hindi nanggagaling sa alabok, ni ang kaguluhan ay sumisibol man sa lupa;

⁷ kundi ang tao ay ipinanganak tungo sa kaguluhan, kung paanong ang siklab, sa itaas ay pumapailanglang.

⁸ "Ngunit sa ganang akin, ang Diyos ay aking hahanapin, at sa Diyos ko ipagkakatiwala ang aking usapin,

⁹ na siyang gumagawa ng mga dakilang bagay at hindi maintindihan, mga kamanghamanghang bagay na hindi mabilang,

¹⁰ nagbibigay siya ng ulan sa lupa, at nagdadala ng tubig sa mga bukid;

¹¹ kanyang itinataas ang mga mapagpakumbaba, at ang mga tumatangis ay itinataas sa katiwasayan.

¹² Kanyang binibigo ang mga pakana ng tuso, anupa't ang kanilang mga kamay ay hindi nagkakamit ng tagumpay.

¹³ Kanyang hinuhuli ang marunong sa kanilang sariling katusuhan; at ang balak ng madaya ay dagling nawawakasan.

¹⁴ Nakakasalubong nila sa araw ang kadiliman, at nangangapa na gaya nang sa gabi kahit katanghalian.

¹⁵ Ngunit siya'y nagliligtas mula sa tabak ng kanilang bibig, at ang maralita mula sa kamay ng makapangyarihan.

¹⁶ Kaya't ang dukha ay may pag-asa, at itinitikom ng kawalang-katarungan ang bibig niya.

¹⁷ "Narito, mapalad ang tao na sinasaway ng Diyos, kaya't huwag mong hamakin ang pagtutuwid ng Makapangyarihan sa lahat.

¹⁸ Sapagkat siya'y sumusugat, ngunit kanyang tinatalian; siya'y nananakit, ngunit nagpapagaling ang kanyang mga kamay.

¹⁹ Ililigtas ka niya mula sa anim na kaguluhan; sa ikapito ay walang kasamaang gagalaw sa iyo.

²⁰ Sa taggutom ay tutubusin ka niya mula sa kamatayan; at sa digmaan, mula sa tabak na makapangyarihan.

²¹ Ikaw ay ikukubli mula sa hagupit ng dila; at hindi ka matatakot sa pagkawasak kapag ito'y dumating.

²² Sa pagkawasak at taggutom, ikaw ay tatawa, at hindi ka matatakot sa mababangis na hayop sa lupa.

²³ Sapagkat ikaw ay makakasundo ng mga bato sa parang; at ang mga ganid sa parang sa iyo ay makikipagpayapaan.

²⁴ Malalaman mo na ang iyong tolda ay ligtas, at dadalawin mo ang iyong kulungan, at walang nawawalang anuman.

²⁵ Malalaman mo rin na ang iyong lahi ay magiging marami, at ang iyong supling ay magiging gaya ng damo sa lupa.

²⁶ Tutungo ka sa iyong libingan sa ganap na katandaan, gaya ng bigkis ng trigo na dumarating sa giikan sa kanyang kapanahunan.

²⁷ Narito, siniyasat namin ito; ito ay totoo. Dinggin mo, at alamin mo para sa kabutihan mo."