Read Ang Bagong Ang Biblia Job 9 Bible Online

Job 9 - Ang Bagong Ang Biblia bible

Job 9

¹ Pagkatapos ay sumagot si Job, at sinabi,

² "Sa katotohanan ay alam kong gayon nga: Ngunit paano magiging matuwid ang isang tao sa harapan ng Diyos?

³ Kung naisin ng isang tao na sa kanya ay makipagtalo, siya'y hindi makakasagot sa kanya ni minsan sa isang libo.

⁴ Siya ay pantas sa puso, at malakas sa kapangyarihan: Sinong nagmatigas laban sa kanya at nagtagumpay?

⁵ Na siyang naglilipat ng mga bundok, at hindi nila nababatid, nang kanyang itaob sila sa kanyang pagkagalit;

⁶ na siyang umuuga ng lupa mula sa kanyang kinaroroonan, at ang mga haligi nito ay nanginginig;

⁷ na siyang nag-uutos sa araw at ito'y hindi sumisikat, na siyang nagtatakip sa mga bituin;

⁸ na nag-iisang nagladlad ng kalangitan, at ang mga alon ng dagat ay tinapakan;

⁹ na siyang gumawa sa Oso at Orion, at sa Pleyades, at sa mga silid ng timog;

¹⁰ na gumagawa ng mga dakilang bagay na di maunawaan, at mga kamanghamanghang bagay na di mabilang.

¹¹ Siya'y dumaraan sa tabi ko, at hindi ko siya nakikita. Siya'y nagpapatuloy ngunit hindi ko siya namamalayan.

¹² Siya'y nang-aagaw, sinong makakahadlang sa kanya? Sinong magsasabi sa kanya, 'Anong ginagawa mo?'

¹³ "Hindi iuurong ng Diyos ang kanyang galit; ang mga katulong ng Rahab ay nakayukod sa ilalim niya.

¹⁴ Paano ko ngang masasagot siya, at mapipili ang aking mga salita laban sa kanya?

¹⁵ Bagaman ako'y walang sala, hindi ako makakasagot sa kanya; kailangang ako'y magmakaawa sa aking hukom.

¹⁶ Kung siya'y ipatawag ko at siya'y sumagot sa akin; gayunma'y hindi ako maniniwala na kanyang dininig ang aking tinig.

¹⁷ Sapagkat ako'y dinudurog niya sa pamamagitan ng isang bagyo, at pinararami ang aking mga sugat nang walang kadahilanan.

¹⁸ Hindi niya ako tutulutang makahinga, sa halip ay pinupuno niya ako ng kapaitan.

¹⁹ Kung ito'y tagisan ng lakas, siya ang malakas! At kung tungkol sa katarungan, sino ang magpapatawag sa kanya?

²⁰ Bagaman ako'y walang sala, hahatulan ako ng sarili kong bibig; bagaman ako'y walang dungis, patutunayan niya akong masama.

²¹ Ako'y walang dungis, hindi ko pinapansin ang sarili ko, kinasusuklaman ko ang buhay ko.

²² Ang lahat ay iisa; kaya't aking sinasabi, kapwa niya pinupuksa ang masama at ang mabuti.

²³ Kapag ang sakuna ay nagdadala ng biglang kamatayan, tinutuya niya ang kapahamakang dumating sa walang kasalanan.

²⁴ Ang lupa ay ibinigay sa kamay ng masama, kanyang tinatakpan ang mga mukha ng mga hukom nito; kung hindi siya iyon, kung gayo'y sino?

²⁵ "Ang mga araw ko ay mas matulin kaysa isang mananakbo, sila'y tumatakbong palayo, wala silang nakikitang mabuti.

²⁶ Sila'y dumaraang parang matutuling bangkang tambo, parang agilang dumadagit sa biktima.

²⁷ Kung aking sabihin, 'Kalilimutan ko ang aking daing, papawiin ko ang aking malungkot na mukha, at magpapakasaya ako.'

²⁸ Ako'y natatakot sa lahat kong paghihirap, sapagkat alam kong hindi mo ako ituturing na walang sala.

²⁹ Ako'y mahahatulan; bakit pa ako magpapakapagod nang walang kabuluhan?

³⁰ Kung ako'y maligo sa niyebe, at hugasan ko ang aking mga kamay sa lihiya,

³¹ gayunma'y itutulak mo ako sa hukay, at kamumuhian ako ng mga sarili kong kasuotan.

³² Sapagkat siya'y hindi tao, na gaya ko, na masasagot ko siya, na kami'y magkasamang haharap sa paglilitis.

³³ Walang hukom sa pagitan namin, na magpapatong ng kanyang kamay sa aming dalawa.

³⁴ Ilayo nawa niya sa akin ang kanyang tungkod, at huwag nawa akong sindakin ng kanyang bagsik.

³⁵ Saka ako magsasalita nang walang takot tungkol sa kanya, sapagkat hindi ako gayon sa aking sarili.