Read Ang Bagong Ang Biblia Psalms 10 Bible Online

Psalms 10 - Ang Bagong Ang Biblia bible

Psalms 10

¹ Bakit ka nakatayo sa malayo, O PANGINOON? Bakit ka nagtatago kapag magulo ang panahon?

² Sa kapalaluan ay mainit na hinahabol ng masama ang dukha; mahuli nawa sila sa binalangkas nilang mga pakana.

³ Sapagkat ipinagmamalaki ng masama ang nais ng kanyang puso, sinusumpa at tinatalikuran ang PANGINOON ng taong sakim sa patubo.

⁴ Sa kapalaluan ng kanyang mukha, ang masama ay hindi naghahanap sa kanya; lahat niyang iniisip ay, "Walang Diyos."

⁵ Ang kanyang mga lakad sa lahat ng panahon ay umuunlad, malayo sa kanyang paningin ang iyong mga hatol na nasa itaas; tungkol sa lahat niyang mga kaaway, kanyang tinutuya silang lahat.

⁶ Iniisip niya sa kanyang puso, "Hindi ako magagalaw; sa buong panahon ng salinlahi ay hindi ako malalagay sa kaguluhan."

⁷ Ang kanyang bibig ay puno ng pagsumpa, pang-aapi at panlilinlang, sa ilalim ng kanyang dila ay kalikuan at kasamaan.

⁸ Siya'y nakaupo sa mga tagong dako ng mga nayon; sa mga kubling dako ang walang sala ay ipinapapatay, ang kanyang mga mata ay palihim na nagmamatyag sa walang kakayahan.

⁹ Siya'y lihim na nagbabantay na parang leon sa kanyang lungga; siya'y nag-aabang upang hulihin ang dukha, sinusunggaban niya ang dukha kapag kanyang nahuli siya sa lambat niya.

¹⁰ Siya ay gumagapang, siya'y yumuyuko, at ang sawing-palad ay bumabagsak sa kanyang mga kuko.

¹¹ Sinasabi niya sa kanyang puso, "Ang Diyos ay nakalimot, ikinubli niya ang kanyang mukha, hindi niya ito makikita kailanman."

¹² O PANGINOON, O Diyos, itaas mo ang iyong kamay, bumangon ka; huwag mong kalilimutan ang nagdurusa.

¹³ Bakit tinatalikuran ng masama ang Diyos, at sinasabi sa kanyang puso, "Hindi mo ako hihingan ng sulit?"

¹⁴ Iyong nakita; Oo, iyong namamasdan ang kaguluhan at pagkayamot, upang iyong mailagay ito sa mga kamay mo; itinalaga ng sawing-palad ang sarili sa iyo; sa mga ulila ikaw ay naging saklolo.

¹⁵ Baliin mo ang bisig ng masama at gumagawa ng kasamaan; hanapin mo ang kanyang kasamaan hanggang sa wala kang matagpuan.

¹⁶ Ang PANGINOON ay hari magpakailanpaman. mula sa kanyang lupain ang mga bansa ay mapaparam.

¹⁷ O PANGINOON, iyong maririnig ang nasa ng maamo; iyong palalakasin ang kanilang puso, iyong papakinggan ng iyong pandinig

¹⁸ upang ipagtanggol ang mga naaapi at ulila, upang hindi na makapanakot pa ang taong mula sa lupa.