Read Ang Bagong Ang Biblia Psalms 106 Bible Online

Psalms 106 - Ang Bagong Ang Biblia bible

Psalms 106

¹ Purihin ang PANGINOON! O magpasalamat kayo sa PANGINOON, sapagkat siya'y mabuti; sapagkat ang kanyang tapat na pag-ibig ay nananatili magpakailanman.

² Sinong makapagsasabi ng mga makapangyarihang gawa ng PANGINOON, o makapagpapakita ng lahat niyang kapurihan?

³ Mapalad silang sumusunod sa katarungan, na sa lahat ng panahon ay gumagawa ng katuwiran.

⁴ Alalahanin mo ako, O PANGINOON, kapag ikaw ay nagpakita sa iyong bayan ng paglingap, dalawin mo ako ng iyong pagliligtas;

⁵ upang makita ko ang kasaganaan ng iyong hinirang, upang ako'y magalak sa kasayahan ng iyong bansa, upang ako'y lumuwalhati na kasama ng iyong mana.

⁶ Kami at ang aming mga magulang ay nagkasala; kami ay nakagawa ng kasamaan, kami ay nagsigawa ng masama.

⁷ Hindi naunawaan ng aming mga magulang ang iyong mga kababalaghan sa Ehipto; hindi nila naalala ang kasaganaan ng iyong mga kagandahang-loob, kundi naghimagsik sa dagat, sa Dagat na Pula.

⁸ Gayunma'y iniligtas niya sila alang-alang sa kanyang pangalan, upang kanyang maipakilala ang kanyang malakas na kapangyarihan.

⁹ Kanyang sinaway ang Dagat na Pula, at ito'y natuyo, pinatnubayan niya sila sa mga kalaliman na parang sa ilang.

¹⁰ Kaya't iniligtas niya sila sa kamay ng namumuhi, at iniligtas niya sila sa kapangyarihan ng kaaway.

¹¹ At tinabunan ng tubig ang kanilang mga kaaway; walang nalabi sa kanila kahit isa man lamang.

¹² Nang magkagayo'y sinampalatayanan nila ang kanyang mga salita; inawit nila ang kanyang kapurihan.

¹³ Ngunit agad nilang nalimutan ang kanyang mga gawa; hindi nila hinintay ang kanyang payo.

¹⁴ Kundi sila'y nagkaroon ng walang pakundangang pananabik nang sila'y nasa ilang, at tinukso nila ang Diyos sa ilang.

¹⁵ Ibinigay niya sa kanila ang kanilang hiniling, ngunit nagpadala ng nakapanghihinang karamdaman sa gitna nila.

¹⁶ Nang ang mga tao sa kampo ay nanibugho kina Moises at Aaron, na banal ng PANGINOON,

¹⁷ ang lupa ay bumuka, at si Datan ay nilamon, at tinabunan ang kay Abiram na pulutong.

¹⁸ Nagkaroon din ng sunog sa kanilang pulutong; sinunog ng apoy ang masasama.

¹⁹ Sila'y gumawa sa Horeb ng guya, at sumamba sa larawang hinulma.

²⁰ Ganito nila ipinagpalit ang kaluwalhatian sa wangis ng baka na kumakain ng damo.

²¹ Nalimutan nila ang Diyos, ang kanilang Tagapagligtas, na gumawa ng mga dakilang bagay sa Ehipto,

²² kahanga-hangang mga gawa sa lupain ng Ham, at kakila-kilabot na mga bagay sa Dagat na Pula.

²³ Kaya't sinabi niya na kanyang lilipulin sila — kung si Moises na kanyang hirang ay hindi humarap sa kanya sa bitak, upang pawiin ang kanyang poot na puksain sila.

²⁴ Kanilang hinamak ang lupaing maganda, yamang wala silang pananampalataya sa pangako niya.

²⁵ Sila'y nagmaktol sa mga tolda nila, at ang tinig ng PANGINOON ay hindi nila sinunod.

²⁶ Kaya't itinaas niya ang kanyang kamay, na sa ilang sila'y kanyang ibubuwal,

²⁷ at ang kanilang binhi sa mga bansa ay itatapon, at ikakalat sila sa mga lupain.

²⁸ At iniugnay nila ang kanilang sarili sa Baal-peor, at kumain ng mga handog na inialay sa mga patay;

²⁹ kanilang ginalit ang PANGINOON sa pamamagitan ng mga gawa nila, at isang salot ang lumitaw sa gitna nila.

³⁰ Nang magkagayo'y tumayo si Finehas at namagitan, at ang salot ay napigilan.

³¹ At iyon ay itinuring sa kanya bilang katuwiran, mula sa salinlahi hanggang sa salinlahi magpakailanman.

³² Kanilang ginalit siya sa tubig ng Meriba, at ito'y naging masama kay Moises dahil sa kanila;

³³ sapagkat sila'y mapanghimagsik laban sa kanyang diwa, at siya'y nagsalitang padalus-dalos sa kanyang mga labi.

³⁴ Ang mga bayan ay hindi nila nilipol, gaya ng iniutos sa kanila ng PANGINOON;

³⁵ kundi nakihalo sila sa mga bansa, at natuto ng kanilang mga gawa.

³⁶ Sila'y naglingkod sa mga diyus-diyosan nila, na naging bitag sa kanila.

³⁷ Kanilang inialay ang kanilang mga anak na lalaki at ang anak na babae sa mga demonyo,

³⁸ nagbuhos sila ng walang salang dugo, ang dugo ng kanilang mga anak na lalaki at mga anak na babae, na kanilang inialay sa diyus-diyosan ng Canaan; at ang lupain sa dugo ay nadumihan.

³⁹ Gayon sila naging karumaldumal sa pamamagitan ng kanilang mga gawa, at naging upahang babae sa kanilang mga gawa.

⁴⁰ Kaya't nag-alab ang galit ng PANGINOON laban sa kanyang bayan, at ang kanyang pamana ay kanyang kinasuklaman,

⁴¹ sa kamay ng mga bansa ay ibinigay niya sila, kaya't pinamunuan sila ng mga napopoot sa kanila.

⁴² Pinagmalupitan sila ng kanilang mga kalaban, at sila'y ipinaalipin sa ilalim ng kanilang kapangyarihan.

⁴³ Iniligtas niya sila nang maraming ulit, ngunit sa kanilang mga payo sila'y mapanghimagsik, at sila'y ibinaba dahil sa kanilang kasamaan.

⁴⁴ Gayunma'y pinahalagahan niya ang kanilang pagtitiis, nang kanyang marinig ang kanilang pagdaing.

⁴⁵ Kanyang naalala alang-alang sa kanila ang kanyang tipan, at siya'y nagsisi ayon sa kasaganaan ng kanyang tapat na pagmamahal.

⁴⁶ Ginawa niyang sila'y kaawaan sa harap ng lahat ng bumihag sa kanila.

⁴⁷ O PANGINOON naming Diyos, kami ay iligtas mo, at mula sa mga bansa kami ay tipunin mo, upang kami'y makapagpasalamat sa iyong banal na pangalan, at lumuwalhati sa iyong kapurihan.

⁴⁸ Purihin ang PANGINOON, ang Diyos ng Israel, mula sa walang hanggan hanggang sa walang hanggan! At sabihin ng buong bayan, "Amen." Purihin ang PANGINOON!