Read Ang Bagong Ang Biblia Psalms 107 Bible Online

Psalms 107 - Ang Bagong Ang Biblia bible

Psalms 107

¹ O magpasalamat kayo sa PANGINOON, sapagkat siya'y mabuti; sapagkat magpakailanman ang kanyang tapat na pag-ibig ay nananatili.

² Sabihing gayon ng tinubos ng PANGINOON, na kanyang tinubos mula sa kamay ng kaaway,

³ at tinipon mula sa mga lupain, mula sa silangan at mula sa kanluran, mula sa hilaga at mula sa timugan.

⁴ Sila'y nagsilaboy sa ilang, sa tapunang lugar, na hindi natagpuan ang daan patungo sa isang bayang matitirahan;

⁵ gutom at uhaw, ang kanilang kaluluwa ay nanghina.

⁶ Nang magkagayo'y dumaing sila sa PANGINOON sa kanilang kabagabagan, at iniligtas niya sila sa kanilang kahirapan.

⁷ Pinatnubayan naman niya sila sa matuwid na daan, patungo sa isang bayang matatahanan.

⁸ Purihin nila ang PANGINOON dahil sa kanyang tapat na pag-ibig, dahil sa kanyang kahanga-hangang mga gawa sa mga anak ng mga tao!

⁹ Sapagkat kanyang binigyang-kasiyahan ang nauuhaw, at ang gutom na kaluluwa ay binusog niya ng mabubuting bagay.

¹⁰ Ang ilan ay nakaupo sa kadiliman at sa anino ng kamatayan, mga bilanggo sa kahirapan at may tanikala,

¹¹ sapagkat sila'y naghimagsik laban sa mga salita ng Diyos, at hinamak ang payo ng Kataas-taasan.

¹² Ang kanilang mga puso ay yumuko sa mahirap na paggawa; sila'y nabuwal at walang sumaklolo.

¹³ Nang magkagayo'y dumaing sila sa PANGINOON sa kanilang kabagabagan, at iniligtas niya sila sa kanilang kahirapan,

¹⁴ Inilabas niya sila sa kadiliman at anino ng kamatayan, at sa kanilang mga gapos ay kinalagan.

¹⁵ Pasalamatan nila ang PANGINOON dahil sa kanyang tapat na pag-ibig, dahil sa kanyang kahanga-hangang mga gawa sa mga anak ng mga tao!

¹⁶ Sapagkat kanyang sinira ang mga pintuang tanso, at pinutol ang mga baras na bakal.

¹⁷ Mga mangmang dahil sa daan ng kanilang mga kasalanan, at dahil sa kanilang mga kasamaan ay nagdanas ng kahirapan;

¹⁸ ang anumang uri ng pagkain ay kinasuklaman ng kanilang kaluluwa, at sila'y nagsilapit sa mga pintuan ng kamatayan.

¹⁹ Nang magkagayo'y nagsidaing sila sa PANGINOON sa kanilang kabagabagan, at iniligtas niya sila sa kanilang kahirapan.

²⁰ Sinugo niya ang kanyang salita, at pinagaling sila, iniligtas niya sila sa kapahamakan.

²¹ Purihin nawa nila ang PANGINOON dahil sa kanyang tapat na pag-ibig, dahil sa kanyang kahanga-hangang mga gawa sa mga anak ng mga tao!

²² At maghandog nawa sila ng mga alay na pasasalamat, at ipahayag ang kanyang mga gawa na may awit ng kagalakan.

²³ Silang nagsisibaba sa dagat sa mga sasakyang-dagat, na nangangalakal sa tubig na malalawak;

²⁴ nakita nila ang mga gawa ng PANGINOON, ang kanyang kahanga-hangang mga gawa sa kalaliman.

²⁵ Sapagkat siya'y nag-utos, at itinaas ang maunos na hangin, na nagpataas sa mga alon ng dagat.

²⁶ Sila'y umakyat hanggang sa langit, sila'y nagsibaba sa mga kalaliman; ang kanilang kaluluwa ay natutunaw sa masama nilang kalagayan,

²⁷ sila'y sumuray-suray at nagpagiray-giray na parang taong lasing, at ang kanilang karunungan ay nawala.

²⁸ Nang magkagayo'y dumaing sila sa PANGINOON sa kanilang kahirapan, at iniligtas niya sila sa kanilang kapighatian.

²⁹ Kanyang pinatigil ang bagyo, anupa't ang mga alon ng dagat ay tumahimik.

³⁰ Nang magkagayo'y natuwa sila sapagkat sila'y nagkaroon ng katahimikan, at dinala niya sila sa kanilang nais daungan.

³¹ Purihin nila ang PANGINOON dahil sa kanyang tapat napag-ibig, at dahil sa kanyang kahanga-hangang mga gawa sa mga anak ng mga tao!

³² Purihin nila siya sa kapulungan ng bayan, at purihin siya sa pagtitipon ng matatanda.

³³ Kanyang ginawang ilang ang mga ilog, at tigang na lupa ang mga bukal ng tubig,

³⁴ maalat na ilang ang mabungang lupain, dahil sa kasamaan ng mga naninirahan doon.

³⁵ Kanyang ginawang mga lawa ng tubig ang ilang, at mga bukal ang tuyong lupain.

³⁶ At kanyang pinatitira roon ang gutom, upang sila'y makapagtatag ng bayang matatahanan;

³⁷ at sila'y maghasik sa mga bukid, at magtanim ng mga ubasan, at magtamo ng mga saganang ani.

³⁸ Sila din ay pinagpapala niya at sila'y mas dumarami; at hindi niya hinayaang ang kanilang kawan ay mabawasan.

³⁹ Nang sila'y nawalan at napahiya sa pamamagitan ng pagmamalupit, kaguluhan, at kapighatian,

⁴⁰ kanyang binuhusan ng paghamak ang mga pinuno, at pinagala sila sa ilang na walang lansangan.

⁴¹ Gayunma'y iniupo niya sa mataas ang nangangailangan mula sa kahirapan, at ang kanilang mga angkan ay ginawang parang kawan.

⁴² Nakikita ito ng matuwid at natutuwa; at tumikom ang bibig ng lahat ng masama.

⁴³ Kung sinuman ang pantas ay unawain niya ang mga bagay na ito, at isaalang-alang niya ang tapat na pag-ibig ng PANGINOON.