Read Ang Bagong Ang Biblia Psalms 108 Bible Online

Psalms 108 - Ang Bagong Ang Biblia bible

Psalms 108

¹ Ang aking puso ay tapat, O Diyos; ako'y aawit, Oo, ako'y aawit ng mga pagpuri ng aking kaluwalhatian!

² Kayo'y gumising, alpa at lira! Aking gigisingin ang madaling-araw!

³ Ako'y magpapasalamat sa iyo, O PANGINOON, sa gitna ng mga bayan; ako'y aawit ng mga papuri sa iyo sa gitna ng mga bansa.

⁴ Sapagkat ang iyong tapat na pag-ibig ay dakila sa itaas ng mga langit, ang iyong katotohanan ay umaabot sa mga ulap.

⁵ Dakilain ka, O Diyos, sa itaas ng mga langit! Ang iyo nawang kaluwalhatian ay maging sa ibabaw ng buong lupa!

⁶ Upang mailigtas ang minamahal mo, tulungan mo ng iyong kanang kamay, at sagutin mo ako!

⁷ Ang Diyos ay nagsalita sa kanyang santuwaryo: "Ang Shekem ay hahatiin ko, at ang Iibis ng Sucot ay susukatin ko.

⁸ Ang Gilead ay akin; ang Manases ay akin; ang Efraim ay helmet ng ulo ko; ang Juda'y aking setro.

⁹ Ang Moab ay aking hugasan; sa Edom ay ihahagis ko ang aking sandalyas; sa ibabaw ng Filistia ay sisigaw ako ng malakas."

¹⁰ Sinong magdadala sa akin sa lunsod na may kuta? Sinong maghahatid sa akin sa Edom?

¹¹ Hindi ba't itinakuwil mo na kami, O Diyos? At hindi ka ba hahayong kasama ng aming mga hukbo, O Diyos?

¹² Ng tulong laban sa kaaway kami ay pagkalooban mo, sapagkat walang kabuluhan ang tulong ng tao.

¹³ Kasama ng Diyos ay gagawa kaming may katapangan; siya ang yayapak sa aming mga kalaban.