Read Ang Bagong Ang Biblia Psalms 111 Bible Online

Psalms 111 - Ang Bagong Ang Biblia bible

Psalms 111

¹ Purihin ninyo ang PANGINOON! Ako'y magpapasalamat sa PANGINOON ng aking buong puso, sa kapulungan ng matuwid at sa kapisanan.

² Dakila ang mga gawa ng PANGINOON, na pinag-aralan ng lahat na nalulugod sa mga iyon.

³ Ang kanyang gawa ay puno ng karangalan at kamahalan, at ang kanyang katuwiran ay nananatili magpakailanman.

⁴ Ginawa niyang maalala ang kanyang kahanga-hangang mga gawa, ang PANGINOON ay mahabagin at mapagbiyaya.

⁵ Siya'y naglalaan ng pagkain sa mga natatakot sa kanya, lagi niyang aalalahanin ang tipan niya.

⁶ Ipinaalam niya sa kanyang bayan ang kapangyarihan ng kanyang mga gawa, sa pagbibigay niya sa kanila ng mana ng mga bansa.

⁷ Ang mga gawa ng kanyang mga kamay ay matuwid at makatarungan; ang lahat niyang mga tuntunin ay mapagkakatiwalaan,

⁸ ang mga iyon ay itinatag magpakailanpaman, ang mga iyon ay ginagawa sa katapatan at katuwiran.

⁹ Siya'y nagsugo ng katubusan sa kanyang bayan; kanyang iniutos ang kanyang tipan magpakailanman. Banal at kagalang-galang ang kanyang pangalan.

¹⁰ Ang pagkatakot sa PANGINOON ay pasimula ng karunungan; ang lahat na nagsisigawa nito ay may mabuting kaunawaan. Ang kanyang kapurihan ay mananatili magpakailanman!