Read Ang Bagong Ang Biblia Psalms 115 Bible Online

Psalms 115 - Ang Bagong Ang Biblia bible

Psalms 115

¹ Huwag sa amin, O PANGINOON, huwag sa amin, kundi sa iyong pangalan ay ibigay ang karangalan, dahil sa iyong tapat na pag-ibig, at dahil sa iyong katapatan!

² Bakit sasabihin ng mga bansa, "Nasaan ngayon ang kanilang Diyos?"

³ Ang aming Diyos ay nasa mga langit, kanyang ginagawa ang anumang kanyang kagustuhan.

⁴ Ang kanilang mga diyus-diyosan ay pilak at ginto, gawa ng mga kamay ng mga tao.

⁵ Sila'y may mga bibig, ngunit hindi nagsasalita; may mga mata, ngunit hindi sila nakakakita.

⁶ Sila'y may mga tainga, ngunit hindi sila nakakarinig; may mga ilong, ngunit hindi sila nakakaamoy.

⁷ Mayroon silang mga kamay, ngunit hindi sila nakakadama, may mga paa, ngunit hindi nakakalakad, at hindi gumagawa ng tunog sa kanilang lalamunan.

⁸ Ang mga gumawa sa kanila ay kagaya nila; gayundin ang lahat ng nagtitiwala sa kanila.

⁹ O Israel, sa PANGINOON ay magtiwala ka! Kanilang saklolo at kanilang kalasag siya.

¹⁰ O sambahayan ni Aaron, sa PANGINOON ay magtiwala kayo! Siya ang kanilang kalasag at saklolo.

¹¹ Kayong natatakot sa PANGINOON, sa PANGINOON ay magtiwala kayo! Siya ang kanilang kalasag at saklolo.

¹² Inalaala tayo ng PANGINOON; tayo'y kanyang pagpapalain; ang sambahayan ni Israel ay kanyang pagpapalain; ang sambahayan ni Aaron ay kanyang pagpapalain;

¹³ pagpapalain niya ang mga natatakot sa PANGINOON, ang mababa kasama ang dakila.

¹⁴ Paramihin nawa kayo ng PANGINOON, kayo at ang inyong mga anak!

¹⁵ Pagpalain nawa kayo ng PANGINOON, siya na gumawa ng langit at lupa!

¹⁶ Ang mga langit ay mga langit ng PANGINOON; ngunit ang lupa ay kanyang ibinigay sa mga anak ng mga tao.

¹⁷ Ang patay ay hindi pumupuri sa PANGINOON, ni sinumang bumababa sa katahimikan.

¹⁸ Ngunit aming pupurihin ang PANGINOON mula sa panahong ito hanggang sa walang hanggan. Purihin ang PANGINOON!