Read Ang Bagong Ang Biblia Psalms 116 Bible Online

Psalms 116 - Ang Bagong Ang Biblia bible

Psalms 116

¹ Minamahal ko ang PANGINOON, sapagkat kanyang dininig ang aking tinig at aking mga hiling.

² Sapagkat ikiniling niya ang kanyang pandinig sa akin, kaya't ako'y tatawag sa kanya habang ako'y nabubuhay.

³ Ang bitag ng kamatayan ay pumalibot sa akin, ang mga hapdi ng Sheol ay nagsihawak sa akin: ako'y nagdanas ng pagkabahala at pagkadalamhati.

⁴ Nang magkagayo'y sa pangalan ng PANGINOON ay tumawag ako: "O PANGINOON, isinasamo ko sa iyo, iligtas mo ang buhay ko!"

⁵ Mapagbiyaya at matuwid ang PANGINOON, Oo, ang Diyos namin ay maawain.

⁶ Iniingatan ng PANGINOON ang mga taong karaniwan; ako'y naibaba at iniligtas niya ako.

⁷ Bumalik ka sa iyong kapahingahan, O kaluluwa ko; sapagkat pinakitunguhan ka na may kasaganaan ng PANGINOON.

⁸ Sapagkat iniligtas mo ang aking kaluluwa sa kamatayan, ang mga mata ko sa mga luha, ang mga paa ko sa pagkatisod;

⁹ Ako'y lalakad sa harapan ng PANGINOON sa lupain ng mga buhay.

¹⁰ Ako'y naniwala nang aking sinabi, "Lubhang nahihirapan ako;"

¹¹ sinabi ko sa aking pangingilabot, "Lahat ng tao ay sinungaling."

¹² Ano ang aking isusukli sa PANGINOON sa lahat niyang kabutihan saakin?

¹³ Aking itataas ang saro ng kaligtasan, at tatawag sa pangalan ng PANGINOON,

¹⁴ tutuparin ko ang aking mga panata sa PANGINOON, sa harapan ng lahat ng kanyang bayan.

¹⁵ Mahalaga sa paningin ng PANGINOON ang kamatayan ng kanyang mga banal.

¹⁶ O PANGINOON, ako'y iyong lingkod; ako'y iyong lingkod, anak ng iyong lingkod na babae; iyong kinalag ang aking mga gapos.

¹⁷ Ako'y mag-aalay sa iyo ng handog ng pasasalamat, at tatawag sa pangalan ng PANGINOON.

¹⁸ Tutuparin ko ang aking mga panata sa PANGINOON, sa harapan ng lahat ng kanyang bayan;

¹⁹ sa mga bulwagan ng bahay ng PANGINOON, sa gitna mo, O Jerusalem. Purihin ang PANGINOON!