Read Ang Bagong Ang Biblia Psalms 132 Bible Online

Psalms 132 - Ang Bagong Ang Biblia bible

Psalms 132

¹ PANGINOON, alalahanin mo para kay David ang lahat ng kanyang kahirapan,

² kung paanong sumumpa siya sa PANGINOON, at nangako sa Makapangyarihan ni Jacob,

³ "Hindi ako papasok sa aking bahay, ni hihiga sa aking higaan,

⁴ Mga mata ko'y hindi ko patutulugin, ni mga talukap ng mata ko'y paiidlipin,

⁵ hanggang sa ako'y makatagpo ng lugar para sa PANGINOON, isang tirahang pook para sa Makapangyarihang Diyos ni Jacob."

⁶ Narinig namin ito sa Efrata, natagpuan namin ito sa mga parang ng Jaar.

⁷ "Tayo na sa kanyang lugar na tirahan; sumamba tayo sa kanyang paanan!"

⁸ Bumangon ka, O PANGINOON, at pumunta ka sa iyong dakong pahingahan, ikaw at ang kaban ng iyong kalakasan.

⁹ Ang iyong mga pari ay magsipagbihis ng katuwiran, at sumigaw sa kagalakan ang iyong mga banal.

¹⁰ Alang-alang kay David na iyong lingkod, mukha ng iyong binuhusan ng langis ay huwag mong italikod.

¹¹ Ang PANGINOON ay sumumpa kay David ng isang katotohanan, na hindi niya tatalikuran: "Ang bunga ng iyong katawan ay aking ilalagay sa iyong luklukan.

¹² Kung iingatan ng iyong mga anak ang aking tipan at ang aking patotoo na aking ituturo sa kanila, magsisiupo rin ang mga anak nila sa iyong trono magpakailanman."

¹³ Sapagkat pinili ng PANGINOON ang Zion; kanya itong ninasa para sa kanyang tirahan.

¹⁴ "Ito'y aking pahingahang dako magpakailanman; sapagkat ito'y aking ninasa, dito ako tatahan.

¹⁵ Ang kanyang pagkain ay pagpapalain ko ng sagana; aking bubusugin ng tinapay ang kanyang dukha.

¹⁶ Ang kanyang mga pari ay daramtan ko ng kaligtasan, at ang kanyang mga banal ay sisigaw ng malakas sa kagalakan.

¹⁷ Doo'y magpapasibol ako ng sungay para kay David, aking ipinaghanda ng ilawan ang aking binuhusan ng langis.

¹⁸ Ang kanyang mga kaaway ay daramtan ko ng kahihiyan, ngunit ang kanyang korona ay magbibigay ng kaningningan."