Read Ang Bagong Ang Biblia Psalms 135 Bible Online

Psalms 135 - Ang Bagong Ang Biblia bible

Psalms 135

¹ Purihin ang PANGINOON! Purihin ang pangalan ng PANGINOON, magpuri kayo, mga lingkod ng PANGINOON,

² kayong nagsisitayo sa bahay ng PANGINOON, sa mga bulwagan ng bahay ng ating Diyos!

³ Purihin ang PANGINOON, sapagkat ang PANGINOON ay mabuti; umawit sa kanyang pangalan, sapagkat ito'y kaibig-ibig.

⁴ Sapagkat pinili ng PANGINOON si Jacob para sa kanyang sarili, ang Israel bilang kanyang sariling pag-aari.

⁵ Sapagkat nalalaman ko na ang PANGINOON ay dakila, at ang ating Panginoon ay higit sa lahat ng mga diyos.

⁶ Ginagawa ng PANGINOON anumang kanyang kinalulugdan, sa langit at sa lupa, sa mga dagat, at sa lahat ng mga kalaliman.

⁷ Siya ang nagpapataas ng mga ulap sa mga dulo ng daigdig, na gumagawa ng mga kidlat para sa ulan at inilalabas ang hangin mula sa kanyang mga kamalig.

⁸ Siya ang pumatay sa mga panganay sa Ehipto, sa hayop at sa tao;

⁹ siya, O Ehipto, sa iyong kalagitnaan, ay nagsugo ng mga tanda at mga kababalaghan laban kay Faraon, at sa lahat niyang mga lingkod;

¹⁰ na siyang sa maraming bansa ay gumapi, at pumatay sa mga makapangyarihang hari,

¹¹ kay Sihon na hari ng mga Amorita, at kay Og na hari sa Basan, at sa lahat ng mga kaharian ng Canaan,

¹² at ibinigay bilang pamana ang kanilang lupain, isang pamana sa kanyang bayang Israel.

¹³ Ang iyong pangalan, O PANGINOON, ay magpakailanman, ang iyong alaala, O PANGINOON, ay sa lahat ng salinlahi.

¹⁴ Sapagkat hahatulan ng PANGINOON ang kanyang bayan, at mga lingkod niya'y kanyang kahahabagan.

¹⁵ Ang mga diyus-diyosan ng mga bansa ay pilak at ginto, na gawa ng mga kamay ng mga tao.

¹⁶ Sila'y may mga bibig, ngunit hindi sila nagsasalita; mayroon silang mga mata, ngunit hindi sila nakakakita;

¹⁷ sila'y may mga tainga, ngunit hindi sila nakakarinig; ni mayroon mang hininga sa kanilang mga bibig.

¹⁸ Maging kagaya sila ng mga gumawa sa kanila — Oo, ang bawat nagtitiwala sa kanila!

¹⁹ O sambahayan ni Israel, purihin ninyo ang PANGINOON! O sambahayan ni Aaron, purihin ninyo ang PANGINOON!

²⁰ O sambahayan ni Levi, purihin ninyo ang PANGINOON! Kayong natatakot sa PANGINOON, purihin ninyo ang PANGINOON!

²¹ Purihin ang PANGINOON mula sa Zion, siya na tumatahan sa Jerusalem. Purihin ang PANGINOON!