Read Ang Bagong Ang Biblia Psalms 144 Bible Online

Psalms 144 - Ang Bagong Ang Biblia bible

Psalms 144

¹ Purihin ang PANGINOON, ang aking malaking bato, kanyang sinasanay ang aking mga kamay para sa digmaan, at ang aking mga daliri sa pakikipaglaban;

² ang aking tapat na pag-ibig at aking tanggulan, aking muog at aking tagapagligtas; aking kalasag at siya kong kinakanlungan, na siyang nagpapasuko sa ilalim ko ng mga bayan.

³ PANGINOON, ano ba ang tao upang siya'y iyong kilalanin, o ang anak ng tao, upang siya'y iyong isipin?

⁴ Ang tao ay katulad ng hininga, gaya ng aninong nawawala ang mga araw niya.

⁵ Iyuko mo ang iyong kalangitan, O PANGINOON, at ikaw ay pumanaog! Hipuin mo ang mga bundok upang ang mga ito'y magsiusok.

⁶ Paguhitin mo ang kidlat at sila'y iyong pangalatin, suguin mo ang iyong mga palaso at sila'y iyong lituhin!

⁷ Iyong iunat mula sa itaas ang iyong kamay, iligtas mo ako at sagipin sa maraming tubig, mula sa kamay ng mga dayuhan,

⁸ na ang mga bibig ay nagsasalita ng kasinungalingan, na ang kanilang kanang kamay ay kanang kamay ng kabulaanan.

⁹ Ako'y aawit ng bagong awit sa iyo, O Diyos; sa salterio na may sampung kawad ako sa iyo'y tutugtog,

¹⁰ na siyang nagbibigay sa mga hari ng pagtatagumpay, na siyang nagligtas kay David na kanyang lingkod sa masamang tabak.

¹¹ Iligtas mo ako, at iligtas mo ako sa kamay ng mga banyaga, na ang mga bibig ay nagsasalita ng kasinungalingan, at ang kanilang kanang kamay ay kanang kamay ng kabulaanan.

¹² Ang amin nawang mga anak na lalaki sa kanilang kabataan ay maging gaya ng mga halaman sa hustong gulang, at ang aming mga anak na babae ay parang mga panulok na bato na tinabas para sa gusali ng isang palasyo;

¹³ ang amin nawang mga kamalig ay mapuno, na naglalaman ng lahat ng uri ng bagay; ang mga tupa namin nawa ay manganak ng mga libo at mga sampung libo sa aming mga parang;

¹⁴ ang mga baka namin nawa ay manganak na walang makukunan o mawawalan, huwag nawang magkaroon ng daing ng pagdadalamhati sa aming mga lansangan!

¹⁵ Pinagpala ang bayan na nasa gayong kalagayan! Maligaya ang bayan na ang Diyos ay ang PANGINOON!