Read Ang Bagong Ang Biblia Psalms 145 Bible Online

Psalms 145 - Ang Bagong Ang Biblia bible

Psalms 145

¹ Aking Diyos at Hari, ika'y aking papupurihan, at aking pupurihin ang pangalan mo magpakailanpaman.

² Pupurihin kita araw-araw, at pupurihin ko ang pangalan mo magpakailanpaman.

³ Dakila ang PANGINOON, at sa papuri'y lubhang karapat-dapat, at ang kanyang kadakilaan ay hindi masukat.

⁴ Ipagmamalaki ng isang salinlahi sa kasunod nito ang iyong mga gawa, at ipahahayag ang iyong mga gawang dakila.

⁵ Sa maluwalhating kaningningan ng iyong karangalan, at sa iyong kahanga-hangang mga gawa, ako'y magbubulay-bulay.

⁶ Ipahahayag ng mga tao ang kapangyarihan ng iyong kakilakilabot na mga gawa; at akin namang ipahahayag ang iyong kadakilaan.

⁷ Kanilang sabik na sasambitin ang alaala ng iyong masaganang kabutihan, at isisigaw nang malakas ang iyong katuwiran.

⁸ Ang PANGINOON ay mapagpala at puno ng awa, hindi magagalitin at sa tapat na pag-ibig ay sagana.

⁹ Ang PANGINOON ay mabuti sa lahat; at ang kanyang awa ay nasa lahat niyang ginawa.

¹⁰ Lahat mong mga gawa, O PANGINOON, ay magpapasalamat sa iyo, at pupurihin ka ng lahat ng mga banal mo!

¹¹ Sasabihin nila ang kaluwalhatian ng iyong kaharian, at ibabalita ang iyong kapangyarihan;

¹² upang ipabatid sa mga anak ng mga tao ang iyong'' mga gawang makapangyarihan, at ang maluwalhating kaningningan ng iyong kaharian.

¹³ Ang kaharian mo'y walang hanggang kaharian, at nananatili sa lahat ng mga salinlahi ang iyong kapangyarihan.

¹⁴ Inaalalayan ng PANGINOON ang lahat ng nalulugmok, at itinatayo ang lahat ng nakayukod.

¹⁵ Ang mga mata ng lahat sa iyo ay nakatingin, at ibinibigay mo sa kanila sa tamang panahon ang kanilang pagkain.

¹⁶ Binubuksan mo ang iyong kamay, binibigyang-kasiyahan mo ang nasa ng bawat bagay na may buhay.

¹⁷ Ang PANGINOON ay matuwid sa lahat ng pamamaraan niya, at mabait sa lahat niyang mga gawa.

¹⁸ Ang PANGINOON ay malapit sa lahat ng sa kanya'y nananawagan, sa lahat ng tumatawag sa kanya sa katotohanan.

¹⁹ Kanyang ibinibigay ang nasa ng lahat ng natatakot sa kanya; kanya ring dinirinig ang kanilang daing, at inililigtas sila.

²⁰ Iniingatan ng PANGINOON ang lahat ng umiibig sa kanya; ngunit lahat ng masama ay lilipulin niya.

²¹ Ang aking bibig ay magsasalita ng papuri sa PANGINOON; at pupurihin ng lahat ng laman ang kanyang banal na pangalan magpakailanpaman.