Read Ang Bagong Ang Biblia Psalms 148 Bible Online

Psalms 148 - Ang Bagong Ang Biblia bible

Psalms 148

¹ Purihin ang PANGINOON! Purihin ang PANGINOON mula sa kalangitan, purihin siya sa mga kaitaasan.

² Purihin ninyo siya, kayong lahat niyang mga anghel, purihin ninyo siya, kayong lahat niyang hukbo!

³ Purihin ninyo siya, araw at buwan; purihin ninyo siya, kayong lahat na mga bituing maningning,

⁴ Purihin ninyo siya, kayong mga langit ng mga langit, at ninyong mga tubig na nasa itaas ng mga langit.

⁵ Ang pangalan ng PANGINOON ay purihin nila, sapagkat siya'y nag-utos, at sila'y nalikha.

⁶ At kanyang itinatag sila magpakailanpaman, siya'y gumawa ng pasiya na hindi mapapawi.

⁷ Mula sa lupa ang PANGINOON ay purihin, ninyong mga dambuhala sa dagat, at lahat ng mga malalim,

⁸ apoy at yelo, niyebe at hamog, maunos na hangin na gumaganap ng kanyang salita!

⁹ Mga bundok at lahat ng mga burol, mga punong nagbubunga at lahat ng mga sedro!

¹⁰ Mga hayop at lahat ng kawan. mga bagay na gumagapang at mga ibong nagliliparan!

¹¹ Mga hari sa lupa at lahat ng sambayanan, mga pinuno at lahat ng mga hukom sa sanlibutan!

¹² Mga binata at gayundin ang mga dalaga; ang matatanda at mga bata!

¹³ Ang pangalan ng PANGINOON ay purihin nila, sapagkat tanging ang kanyang pangalan ang dakila; nasa itaas ng lupa at mga langit ang kaluwalhatian niya.

¹⁴ Nagtaas siya ng sungay para sa kanyang bayan, ng papuri para sa lahat ng kanyang mga banal, para sa mga anak ni Israel na malapit sa kanya. Purihin ang PANGINOON!